24.08.2019, Shembi

Ministrler Keńesinde “SMS-NAZORAT” baǵdarlaması engizildi

Qaraqalpaqstan Respublikası Ministrler Keńesinde Ózbekstan Respublikası Prezidentiniń Pármanları, qararları menen biylikleri, bayanlamaları jáne Ministrler Kabinetiniń hújjetleri menen tapsırmalarınıń orınlawı ústinen qadaǵalawdı bunnan bılay da jetilistiriw maqsetinde Ministrler Keńesi SHólkemlestiriw-qadaǵalaw toparınıń baslaması menen qol telefon arqalı alıp barılatuǵın «SMS-NAZORAT» (3700 qısqa nomerli) baǵdarlaması iske túsirildi.



Bul baǵdarlama Ózbekstan Respublikası Prezidentiniń 2018-jıl 5-oktyabrdegi “Mámleketlik uyımlar menen shólkemlerde atqarıw tártibin bunnan bılay da bekkemlew ilajları haqqında”ǵı PQ-3962-sanlı qararınıń orınlanıwın támiyinlew maqsetinde islep shıǵıldı.

Belgili bolǵanınday, jámiyetlik turmıstıń barlıq tarawlarında alıp barılıp atırǵan reformalardıń nátiyjeli ámelge asırılıwı, birinshi gezekte, mámleketlik basqarıw hákimiyatınıń barlıq buwınlarında atqarıw tártibiniń zárúr dárejede shólkemlestiriliwine baylanıslı, – deydi Qaraqalpaqstan Respublikası Ministrler Keńesi SHólkemlestiriw-qadaǵalaw toparınıń baslıǵı R.Rısnazarov.

Baǵdarlamanıń abzallıǵı sonda, bunnan bılay Ministrler Keńesi Baslıǵınıń orınbasarları menen Basqarma, sekretariyat, topar hám bólim baslıqları Ministrler Keńesiniń Baslıǵı tárepinen ózlerine júklengen tapsırmalar haqqındaǵı maǵlıwmatlardı qosımsha túrde óz qol telefonları arqalı da aladı. Yaǵnıy, Ministrler Keńesiniń Baslıǵı tárepinen berilgen tapsırma hár bir orınlawshı xızmetkerdiń mobil telefonına xat orınlanǵansha Ministrler Keńesiniń SHólkemlestiriw-qadaǵalaw toparı tárepinen kúnine úsh márte eskertiw xabarnaması jiberiledi.


Áhmiyetli tárepi, eger orınlawshılar tapsırmalardı óz múddetinen keshiktirgende, bul tuwralı Qaraqalpaqstan Respublikası Ministrler Keńesi Baslıǵınıń mobil telefonına avtomat túrde maǵlıwmat kelip túsedi.

–Statistikalıq  maǵlıwmatlarǵa qaraǵanda hár bir adam óz mobil telefonına kúnine 40 márte názer taslaydı,– deydi Qaraqalpaqstan Respublikası Ministrler Keńesi janındaǵı “Málimleme-kommunikaciya texnologiyaların rawajlandırıw orayı” MUK direktorı, baǵdarlamanı jaratıwshı O.Turǵanbaev. – Bul bolsa, orınlawshı sms xabardı alıp oqıwı ushın 90%ke múmkinshilik beredi. Sebebi, sociallıq tarmaqlar menen elektron pochtalar arqalı (E-mail) maǵlıwmatlardı alıw ushın bizge álbette, internet zárúr boladı. «SMS-NAZORAT» (3700 qısqa nomerli) baǵdarlamasında islewde bolsa, internet hám mobil telefonda balans bolıwı shárt emes.

Juwmaqlap aytqanda, bul baǵdarlama – Qaraqalpaqstan Respublikası Ministrler Keńesiniń xızmetkerleri Ministrler Keńesi baslıǵı tárepinen ózlerine tapsırılǵan tapsırmalardı belgilengen múddetlerde, hátteki, múddetinen aldın orınlanıwına xızmet etedi.


Qaraqalpaqstan Respublikası Ministrler Keńesiniń Málimleme xızmeti