21.01.2019, Dúyshembi

Prezidenttiń Oliy Majliske Múrájatı hám onnan kelip shıǵatuǵın wazıypalar dodalandı

7-yanvar kúni Ájiniyaz atındaǵı Nókis mámleketlik pedagogikalıq institutı kishi májilisler zalında Ózbekstan Respublikası Prezidentiniń 2018-jıl 28-dekabrdegi Oliy Majlis Senatı hám Nızamshılıq palatasına jollaǵan Múrájatı, onnan kelip shıǵatuǵın juwmaqlar hám joqarı bilimlendiriw sisteması aldında turǵan wazıypalarǵa arnalǵan májilis bolıp ótti.

Májilisti institut rektorı B.Otemuratov kiris sózi menen ashıp berdi hám basqarıp bardı.


Institut rektorı Múrájatta ótip baratırǵan jılda ámelge asırılǵan jumıslar hám kelesi jılǵa arnalǵan jobalar, mámleketimizdiń ishki hám sırtqı siyasatındaǵı tiykarǵı principler belgilep berilgeni xalqımız arasında úlken qızıǵıwshılıq oyatıp atırǵanı haqqında atap ótti.

Májiliste Múrájat mazmunı hám onda Aral boyı regionı máselesiniń sáwleleniwi boyınsha akademik J.Bazarbaev sózge shıqtı.


Bayanatta atap ótilgenindey, házirgi waqıtta Aral apatshılıǵı sebepli 5,5 million gektardan aslam maydanda Aralqum sahrası payda boldı. Hár jılı 100 million tonnaǵa shamalas qum hám duz hawaǵa kóterilmekte. Aymaqta ekologiyalıq apatshılıq aqıbetlerin jumsartıw maqsetinde BMSHnıń Aral boyı regionı ushın Insan qáwipsizligi boyınsha kóp tárepleme sheriklik tiykarında Trast fondı shólkemlestirilip, oǵan dáslepki kúnlerden baslap Yaponiya, Norvegiya, Katar hám Saudiya Arabstanı sıyaqlı elleri qarjı ajırattı. Prezident baslaması menen Aral teńiziniń suwsız qalǵan aymaǵında jasıl toǵaylıqlar payda etiwge ayrıqsha dıqqat bólinip, 2019-jılı 500 mıń gektarlıq jerde toǵaylıq payda etiw jobalastırılǵan.

Ilajda Qaraqalpaqstan Respublikası Prokuraturasınan R.Qurbanov sózge shıǵıp, Múrájatta korrupciyaǵa qarsı gúresiw boyınsha bildirilgen pikir hám usınıslar, aldaǵı wazıypalar boyınsha keń túrde toqtaldı. Ásirese, medicina hám bilimlendiriw procesindegi korrupciya, dámegóyshilik sıyaqlı illetlerge qarsı gúresiw rawajlanıw kepili ekenligi jáne bul máseleler kúnniń aktual máseleleriniń biri ekenligi atap ótildi.


Májiliste instituttıń jaslar menen islesiw máseleleri boyınsha prorektorı Q.Qadirov, oqıw isleri boyınsha prorektorı M.Jumamuratov hám ilimiy isler hám innovaciyalar boyınsha prorektor M.Jalelovlar Múrájattan kelip shıǵıp ámelge asırılatuǵın wazıypalarǵa toqtaldı.

Májilis soraw-juwaplar hám óz-ara pikir alısıwlar menen dawam etti.


Islam Matekov.