18.12.2018, Siyshembi

Belsendi jas shańaraqlar jańa jıldı jańa úyinde kútip aladı


Nókis qalası «Qumbız awıl» mákan puqaralar jıyını aymaǵında  elimizdiń jámiyetlik turmısında belsene qatnasıp atırǵan gezektegi 48 jas shańaraq iyelerine óz kvartiraların tapsırıw máresimi bolıp ótti.

Ilajda Qaraqalpaqstan Respublikası Joqarǵı Keńesi Baslıǵınıń orınbasarı A.Hamraev, Nókis qalasınıń hákimi P.Tóreshov, Ózbekstan Respublikası Jaslar awqamı baslıǵınıń finans isleri boyınsha orınbasarı S.Maxsudov, Jaslar awqamı Qaraqalpaqstan Respublikası Keńesiniń baslıǵı A.Daniyarov hám Ǵalaba xabar qurallarınıń wákilleri qatnastı.



Atap ótilgenindey, Ózbekstan Respublikası Ministrler Kabinetiniń 2014-jıl 8-sentyabrde qabıl etilgen «Elimizdiń jámiyetlik turmısında belsene qatnasıp atırǵan jas shańaraqlardı turaq jay menen támiyinlewdi bunnan bılay da qollap-quwatlaw ilajları haqqında»ǵı 250-sanlı qararı hám Húrmetli Prezidentimiz tárepinen 2017-jıl 5-iyulde qabıl etilgen «Jaslarǵa baylanıslı mámleketlik sıyasattıń nátiyjeliligin arttırıw  hám Ózbekstan Jaslar awqamınıń jumısın qollap-quwatlaw haqqında»ǵı pármanına tiykar Respublikamızdıń belsendi jasları izbe-iz turaq jaylar menen támiyinlenip kelinbekte.

Bul kóp qabatlı turaq jaylar «Qońırat Stroy Stil» juwapkershiligi sheklengen jámiyetiniń qolı gúl qurılısshıları tárepinen belgilengen múddetlerde sapalı qurıp pitkerildi. Turaq jaylar zamanagóy turmıslıq úskeneler menen támiyinlengen.


SHıǵıp sóylegenler tárepinen jańa turaq jańa iyeleri qızǵın qutlıqlanıp, olarǵa kvartira giltleri saltanatlı túrde tapsırıldı.


– Kórkem óner tarawındaǵı azı-kem dóretiwshilik miynetlerim bahalanıp, usı turaq jayǵa iye bolıw baxtı nesip etkeninen oǵada quwanıshlıman, – deydi Nókis pedagogikalıq kolledjiniń oqıtıwshısı, Ózbekstan kólemindegi birneshe tańlawlardıń jeńimpazı Erisbay baqsı Asqarov. –Bul ushın bárinen burın, biz jaslardıń ǵamxorshısı Húrmetli Prezidentimizge, Qaraqalpaqstan Respublikası Húkimetine, Ózbekstan Respublikası Jaslar awqamı hám onıń Qaraqalpaqstan Respublikası Keńesine tereń minnetdarshılıq bildiremen. Sonday-aq, búgingi barlıq baxıtlı shańaraqlar – teńleslerimdi de jańa turaq jayǵa iye bolǵanı menen qızǵın qutlıqlayman. Keleshekte bizlerge berilgen joqarı isenimdi, yaǵnıy elimizdiń jámiyetlik turmısında bunnan bılay da belsendi qatnasıwda kúsh jigerimizdi ayamaymız.


Saltanatlı ilaj elimizge belgili kórkem óner xızmetkerleriniń koncert baǵdarlaması menen dawam etti.


Qaraqalpaqstan Respublikası Ministrler Keńesiniń Málimleme xızmeti