16.11.2018, Juma

Opavadaǵı Sileziya universiteti doktarantı TITU Nókis filialında


Opavadaǵı Sileziya universitetiniń doktarantı Tursınbay Uteev TITU Nókis filialınıń student  jaslarına fizika páninen inglis tilinde tálim bermekte.

TITU Nókis filialında tarawǵa tiyisli rawajlanǵan shólkemler, kompaniyalar hám joqarı oqıw orınları menen birge islesiw jaqsı jolǵa qoyılǵan. Maqset student jaslardıń zamanagóy bilim iyelewi ushın elede qolaylı sharayatlar jaratıw, dúnyadaǵı rawajlanǵan universitetler menen tájiriybe almasıw bolıp tabıladı. 


–«Búgingi zaman jasları shet tillerin jaqsı biliwi hám óz tańlaǵan baǵdarı boyınsha tolıq bilimge iye bolıwı lazım. Bunıń ushın studentler 1-kursınan baslap, óz qálewi tiykarında ilimiy jumısın tańlap tikkeley sol boyınsha puqta jumıs alıp barıwı kerek. Sonday-aq, ilimiy jumısı boyınsha jeke tárizde oylap tapqan ideyaların jańalıqların seminar-treningler arqalı basqalarǵa túsindirip barıwı da áhmiyetli.  Áne sonda ǵana ilim rawajlanadı»-deydi, Opavadaǵı Sileziya Universitetiniń doktarantı Tursınbay Uteev.


Inglis tilinde fizika páninen tálim alıp atırǵan student jaslar doktaranttan kóplegen maǵlıwmatlarǵa iye bolmaqta. Álbette bunday tájiriybe almasıwlar jańa innovaciyalıq, ilimiy jańalıqlardı jaratıwda tiykar bolıwı sózsiz. 

Maǵlıwmat ushın, Tursınbay Uteev Ózbekstan Milliy universiteti «Fizika» fakulteti bakalavr hám magistratura tálim baǵdarların tamamlaǵan. Student waqtında Ózbekstan Respublikası Ilimler Akademiyası Astronomiya institutı hám Xalıqaralıq quyash institutında jumıs islegen. Búgingi kúnde Opavadaǵı Sileziya universitetiniń doktarantı.  Ol Astrofizika iliminde “Black hole”(Qara qurım) baǵdarında ilimiy jumıs alıp barmaqta. 


         TITU Nókis filialınıń Baspasóz xızmeti