15.11.2018, Piyshembi

«Tashkent» miymanxanası paydalanıwǵa tapsırıldı



Usı jıl 6-noyabr kúni paytaxtımız Nókis qalasında «Tashkent» miymanxanası paydalanıwǵa tapsırıldı.

Usı múnásibet penen ótkerilgen ilajda Qaraqalpaqstan Respublikası Joqarǵı Keńesiniń komitet baslıǵı D.Qurbaniyazov, Nókis qalasınıń hákimi P.Tóreshov hám basqalar shıǵıp sóylep, jıynaǵanlardı jańa imarattıń paydalanıwǵa tapsırılıwı menen qutlıqladı.


Atap ótilgenindey, bir neshe jıldan berli paydalanılmay turǵan «Tashkent» miymanxanasınıń imaratı Ózbekstan Respublikası Prezidentiniń 2014-jıl 3-iyuldegi «Mámleketlik múlk obektlerin kishi biznes hám jeke isbilermenlik subektlerine satıw boyınsha qosımsha ilajlar haqqında»ǵı qararına muwapıq tender sawdasına qoyılıp, «KKRASI BETON» jeke menshik kárxanası tárepinen investiciya minnetleri hám jańa jumıs orınların jaratıw shárti menen «nol»lik bahada satıp alındı.


Investiciya baǵdarlamasınıń dáslepki bahası  3 milliard 200 million sum etip belgilengen bolsa, haqıyqatında investor óz qarjıları esabınan kirgizilgen investiciyanıń muǵdarı 8 milliard sumdı quradı. Nátiyjede premium klass bólmelerine iye 63 orınlı úsh juldızlı «Tashkent» miymanxanası shólkemlestirilip, óz jumısın basladı. Usınıń esabınan 30 jańa jumıs ornı jaratıldı.




Ilaj qatnasıwshıları bul jerde miymanlar ushın jaratılǵan sharayatlar menen jaqınnan tanıstı.




Qaraqalpaqstan xabar agentligi.

M.HÁBIYBULLAEVtıń túsirgen súwretleri.