15.11.2018, Piyshembi

Qaraqalpaqstanlı isbilermenlerdiń 6.4 milliard qarızınan keshildi

Qaraqalpakstan Respublikası Mámleketlik salıq basqarması tárepinen isbilermenlik subektleri jumısın hár tárepleme qollap-quwatlaw, olarǵa ámeliy járdem kórsetiw boyınsha alıp barılǵan úgit-násiyat jumısları nátiyjesinde respublikamızdaǵı 325 puqaranıń isbilermenlik jumısların qayta tiklegeni hámde belgilengen tártipte dizimnen ótiwi menen olardaǵı 6.4 milliard sum salıq qarızı esaptan shıǵarıldı. Bul haqqında Qaraqalpaqstan Respublikası Mámleketlik salıq basqarması Jámiyetshilik penen baylanıslar hám huqıqıy málimleme sektorı xabar bermekte. 

Búgin elimizde isbilermenlikti hár tárepleme qollap-quwatlanıp, jumısların keńeytip barıwı ushın imkaniyatlar, qolaylıqlar, sharayatlar jaratılıp atır. Sonıń menen birge, artıqsha tekseriw hám áweregershiliklerdi saplastırıw maqsetinde de reformalı dástúrler ámelge asırılmaqta.

Prezidentimizdiń 2017-jıl 27-iyul sánesindegi «Isbilermenlik subektleriniń huquqların hám nızamlı máplerin qorǵaw sistemasın bunnan bılayda jetilistiriw ilajları haqqqında»ǵı PP-5490-sanlı pármanı isbilermenlikti rawajlandırıw jolında ámelge asırılıp atırǵan reformalardı jańa basqıshqa kóteriwde, tarawdaǵı ushırasıp atırǵan mashqalalarǵa sheshim tabıw hám isbilermenlerdiń isenimli huqıqıy mápleriniń qorǵalıwın támiyinlewde xızmet etpekte.

–Bir neshe jıldan berli mámleketten finanslıq járiyma nátiyjesinde kelip shıqqan qarızlarımdı toqtatıw máselesin sheshe almay qıynalıp júrgen edim,–deydi puqara Q.Xojaev. – Mámleketimiz tárepinen berilip atırǵan jeńilliklerdi, salıqtaǵı karızımnıń keshiliwin esitip isbilermenlikke bolgan qızıǵıwshılıǵım jáne de astı hám usı kúnniń ózinde-aq jumısımdı qayta tikledim. Mámleketlik salıq xızmeti organları tárepinen meniń 58,3 million sumlıq salıq qarızım esaptan shıǵarıldı. Usı orında, biz isbilermenler ushın bunday imkaniyatlardı jaratıp berip atırǵan Prezidentimizge sheksiz minnetdarshılıq bildiremen.

Álbette, elimizde isbilermenler ushın imkaniyatlar esigi keń ashılǵan. Olardan maqsetke muwapıq, durıs paydalana alıw bolsa dáwirdiń talabı bolıp tabıladı.  

Qaraqalpaqstan Respublikası Ministrler Keńesiniń Málimleme xızmeti