17.10.2018, Sárshembi

Qıtaydıń Ózbekstandaǵı elshisi Beruniy rayonında paxta terdi


   

 Aldın xabar etilgenindey, Qıtay Xalıq Respublikasınıń Ózbekstandaǵı Ayrıqsha həm tolıq huqıqlı elshisi Czyan Yan xanımnıń respublikamızǵa saparı dawam etpekte. Elshi 4-oktyabr kúni Beruniy rayonında boldı.

    Miyman dəslep rayondaǵı Qıtay Xalıq Respublikasınıń «SHansi Eko Cement» kompaniyasınıń tikkeley investiciyası menen qurılısı baslanıw aldında turǵan «SHabbaz obod cement» JSHJne tiyisli cement zavodı qurılatuǵın jer maydanın kózden ótkerdi. Bul jerde alıp barılıp atırǵan jumıslar menen jaqınnan tanısıp, sheriklik negizinde qurıp-pitkeriliwi rejelestirilgen cement zavodı joybarın joqarı bahaladı.

    Bunnan soń miymanlar «Abay» APJ aymaǵındaǵı «SHaxrixan Nadirbek» fermer xojalıǵında bolıp, usı jıldıń aprel ayında qıtaylı qənigelerdiń qatnasıwında shorlanǵan jerlerde təjiriybe sıpatında egilgen paxta atızın kózden ótkerdi. SHigittiń ónip shıǵıwı həm zúrəəti menen qızıqsındı. Áhmiyetlisi, Czyan Yan xanım usı paxta atızında ayrıqsha qızıǵıwshılıq penen paxta terdi. Ol paxta teriminde tikkeley ózi qatnasqanlıǵınan həm bul arqalı óziniń paxta teriw ərmanınıń orınlanǵanlıǵınan quwanıshlı ekenin aytıp, bul ushın fermer xojalıǵı menen «Abay» APJ basshılarına óz minnetdarshılıǵın bildirdi.

   Paxta teriminen soń miymanlar rayondaǵı «Quralpa» qawın bazarın barıp kórip, ol jerdegi bahalar menen tanıstı həm qawınlardıń mazasına joqarı baha berdi.

   Kúnniń ekinshi yarımında miymanlar «Kashfiyotchi yoshlar» jeke menshik kərxanasına tiyisli gidroponika usılında pomidor jetistiriwshi teplicada bolıp, ol jerdegi jumıslar menen de jaqınnan tanıstı həm kərxana basshısına óziniń unamlı pikirlerin bildirdi. 

   Elshiniń paxta terimine qatnasıwı barlıq jaslarımızdı, gúllən xalqımızdı paxtanıń bir xanasın da zaya etpey jıynap-terip alıwǵa ruwxlandıradı, degen úmittemiz.