18.10.2018, Piyshembi

Qıtay xalıq respublikasınıń elshisi respublikamızda



Qıtay Xalıq Respublikasınıń Ózbekstandaǵı Ayrıqsha hám tolıq huqıqlı elshisi  Czyan Yan xanım ómirlik joldası menen respublikamızǵa keldi.



Qaraqalpaqstan Respublikası Joqarǵı Keńesinde elshini qabıllaw máresimi boldı. Ilajda  Qaraqalpaqstan Respublikası Joqarǵı Keńesiniń Baslıǵı M.Erniyazov miymandı úlkemizdiń geografiyalıq jaylasıwı, xalqı, hákimshilik basqarıw dúzilisi, milliy baylıqları menen jaqınnan tanıstırdı.



Óz gezeginde Czyan Yan xanım jıllı júzlilik penen qabıl etkeni ushın respublikamız basshısına minnetdarshılıq bildirdi. Búgingi kúni Aral teńiziniń qurıp ketiwi tek usı regionnıń ǵana emes, pútkil dúnya jámiyetshiliginiń ortalıq mashqalasına aylanbaqta. Aymaqta júzege kelgen ekologiyalıq mashqalalardı saplastırıw, bul jerde jasawshı xalıqtıń turmıs dárejesin jaqsılaw boyınsha bir qatar joybarlar ámelge asırılmaqta. Atap aytqanda, Beruniy rayonında shólge shıdamlı paxta hám basqa da daqıllar egilip, tájiriybede sınap kórilmekte. Egerde tájiriybe unamlı nátiyje berse, bul baǵdardaǵı jumıslar ele de dawam etedi. Sonıń menen birge, basqa tarawlarda da birge islesiw perspektivaları úyrenip shıǵılatuǵınlıǵın bildirdi.



Bunnan keyin miymanlar Birlesken Milletler SHólkemi Rawajlandırıw Baǵdarlamasınıń respublikamızdaǵı ofisinde bolıp, «Aral regionı ushın insan qáwipsizligi boyınsha kópsheriklik qorın shólkemlestiriw arqalı Aral teńizi apatshılıǵınan jábir kórgen xalıqtıń turmıs sharayatı múmkinshiliklerin bekkemlew» joybarı sheńberinde ámelge asırılıp atırǵan jumıslar menen tanıstı. Bul joybardıń maqseti, respublikamızdıń SHomanay, Moynaq hám Taxtakópir rayonları xalqınıń turmıs sharayatın jaqsılaw, olardıń bántligin támiyinlew, rayon turǵınlarına kórsetilip atırǵan hár qanday xızmettiń sapasın arttırıwdan ibarat.

Kúnniń ekinshi yarımında elshi Ámiwdárya rayonında bolıp, «Joybar aymaqlarınıń suw menen támiyinleniw dárejesin kóteriw ushın Ámiwdárya hám kanallardı tazalaytuǵın úskenelerdi satıp alıw» joybarı sheńberinde alıp barılıp atırǵan jumıslar menen tanıstı.

Respublikamızǵa saparı dawamında miymanlar Ózbekstan kórkem óner akademiyası Qaraqalpaqstan bólimi janında BMSHnıń «Aral apatshılıǵınan jábir kórgen xalıqtıń turmıs sharayatın jaqsılaw» Rawajlandırıw Baǵdarlaması щeńberinde YuNESKOnıń qollap-quwatlawında shólkemlestirilgen milliy ónermentshilikti rawajlandırıw orayında, I.V.Savickiy atındaǵı kórkem óner muzeyinde, paytaxtımızdıń basqa da dıqqatqa ılayıq orınlarında boladı.

 

D.ABIBULLAEV,

Qaraqalpaqstan xabar agentliginiń xabarshısı.

M.Habibullaevtıń túsirgen súwretleri