16.12.2018, Ekshembi

Qaraqalpaqstanda birinshi márte Internet arqalı kitap satıp alıw imkaniyatı jaratıldı


Qaraqalpaq mámleketlik universiteti ximiyalıq texnologiya fakultetiniń 4-kurs studenti Salamatdin Pirniyazov hám programmist Nawrız Nókisbaevlardıń baslaması menen Qaraqalpaqstanda birinshi márte Internet tarmaǵı arqalı kitap hám keńse buyımların satıp alatuǵın tarmaq jaratıldı. Bul haqqında Salamatdin Pirniyazov bizge xabar berdi.

Bul tarmaq aladinmarket.uz mánzilinde jumıs basladı. Tarmaqta abiturient hám mektep oqıwshılarına arnalǵan hám qaraqalpaq, ózbek jáne rus tillerindegi 400 ge shamalas kitaplar, sonday-aq, 300 ge shamalas túrdegi keńse buyımları jaylastırılǵan.

– Biz paydalanıwshılardıń pikir hám usınısların esapqa alıp usı tarmaqtı jarattıq. Paydalanıwshılar tarmaqqa kirip, ózine unaǵan kitap yamasa keńse buyımlarına buyırtpa beriwi múmkin. Olardıń bahaları da kórsetilgen. Jáne bir qolaylıq sıpatında, biz buyırtpa berilgen kitap yamasa keńse buyımların 5000 sum esesine paydalanıwshılardıń úyine alıp barıp beremiz, – deydi Salamatdin Pirniyazov.

Sáwbetlesimizdiń aytıwına qaraǵanda, tarmaq fondı ele de tolıqtırılıp barıladı.

Maǵlıwmat ushın aytıp ótiw kerek, bul tarmaq Qaraqalpaqstandaǵı kitap hám keńse buyımların Internet tarmaǵı arqalı satıp alıw múmkin bolǵan dáslepki tarmaq bolıp tabıladı.

 

Islam Matekov,

Qaraqalpaqstan xabar agentliginiń sholıwshısı.