28.03.2024, Piyshembi

Maxset Otemuratov – «Qaraqalpaqstan kórkem óner sarayı» mámleketlik mákemesine direktor etip tayınlandı

30-may kúni «Qaraqalpaqstan kórkem óner sarayı» mámleketlik mákemesinde májilis bolıp ótti.
Oǵan Qaraqalpaqstan Respublikası Mádeniyat ministri Q.Turdiev, teatrlar, koncert-tamasha shólkemleri, oqıw orınlarınıń basshıları, mádeniyat hám kórkem óner wákilleri qatnastı.
Májilisti  Qaraqalpaqstan Respublikası Mádeniyat ministri Q.Turdiev ashtı hám Húrmetli Prezidentimiz tárepinen elimizdi sociallıq-ekonomikalıq rawajlandırıw baǵdarında alıp barılıp atırǵan keń kólemli reformalar nátiyjesinde mádeniyatımız hám kórkem ónerimizge de úlken itibar qaratılıp atırǵanlıǵın ayrıqsha atap ótti.

Ózbekstan Respublikası Ministrler Kabinetiniń 2021-jıl 8-maydaǵı «Qaraqalpaqstan Respublikasında mádeniyat hám kórkem óner tarawın jáne de rawajlandırıw ilajları haqqında»ǵı qararı menen shólkemlestirilgen «Qaraqalpaqstan kórkem óner sarayı» mámleketlik mákemesi de Qaraqalpaqstan Respublikası Joqarǵı Keńesi Prezidiumınıń arnawlı qararı menen qayta rekonstrukciya etilip, zamanagóy kóriniske iye bolǵan edi.
Bul mádeniyat mákemesinde mámleketlik hám mámleketlik emes shólkemlerdiń saltanatlı ilajları, hár túrli koncert baǵdarlamaları, kórik tańlaw hám festivallar, kórgizbeler, mádeniyat, kórkem óner, ilim-pán, ádebiyat hám basqa tarawlardıń kórnekli wákilleri menen ushırasıwlar, arnawlı tayarlanǵan baǵdarlamalar hám basqa da ilajlardı ótkeriw ushın barlıq sharayatlar jaratılǵan.

Májiliste shólkemlestiriw máselesi qaralıp, «Qaraqalpaqstan kórkem óner sarayı» mámleketlik mákemesi direktorı lawazımına Ózbekstan hám Qaraqalpaqstanǵa xızmet kórsetken artist Otemuratov Maxset Keunimjaevich tayınlandı.

Óz gezeginde M.Otemuratov ózine bildirilgen isenimdi aqlawǵa, bilim hám tájiriybesin mádeniyat hám kórkem ónerdi hár tárepleme rawajlandırıw, xalıqqa sapalı mádeniy xızmet kórsetiw, talantlı jaslardı hár tárepleme qollap-quwatlaw baǵdarında alıp barılıp atırǵan iygilikli islerge múnásip úles qosıw ushın  jumsaytuǵınlıǵın bildirdi.

Ministrliktiń málimleme xızmeti