28.03.2024, Piyshembi

Bozatawda 8 mlrd 346 mln so’mlıq nasos agregatları qurılmaqta


Prezidentimizdiń ótken jılı sentyabr ayında Qaraqalpaqstanǵa, sonıń ishinde, Bozataw rayonına bolǵan saparı dawamında rayonda suw támiynatın jaqsılaw,  paydalanılmay turǵan jerler hám qıytaq jerlerden ónimli paydalanıw sıyaqlı áhmiyetli máseleler boyınsha juwapkerlerge tapsırmalar belgilep bergen edi.

Usı tapsırmalardıń orınlanıwın támiyinlew maqsetinde «Ámiwdárya» dáryasınıń PK-900 bóliminde sekundına 3 metr kub suw shıǵarıw quwatlılıǵına iye nasos agregatların ornatıw belgilendi hám  búgingi kúnde  «Qaraqalpaqstansuw qurılıs invest»DM buyırtpası tiykarında "Bunyodkor Meros"JShJ tárepinen qurılıs jumısları alıp barılmaqta.

 

 Nasos agregatları "Suvmash" JShJ menen dúzilgen shártnama tiykarında satıp alınǵan bolıp, dvigatellerin montajlaw jumısları juwmaqlandı hám obekttegi qurılıs jumısları 1-mart sánesine shekem juwmaqlanıwı rejelestirilmekte.

 

 Nasos agregatlarınıń iske túsiwiniń nátiyjesinde rayon aymaǵındaǵı 76,9 km aralıqtaǵı "Erkindárya" xojalıqlarara kanalı boyında jaylasqan 1,5 mıń xojalıqtıń 210ga qıytaq jerleri, 50 den artıq awıl xojalıǵı kárxanalarınıń 2,8 mıń ga egin maydanları, 3,5 mıń ga jaylaw maydanların suwǵarıw hámde "Bozataw" posyolkası, "Qusqanataw" awıl puqaralar jıyını aymaǵında jasawshı xalıqtı ishimlik suwı menen hámde aymaqtaǵı sharwa malların suw menen támiyinlewdegi mashqalalar óziniń unamlı sheshimin tabadı.

Bozataw rayonı hákimliginiń Málimleme xızmeti