29.03.2024, Juma

Jaslar máseleleri ornında saplastırıldı

Búgin Ellikqala rayonında Ózbekstan Respublikası Prezidentiniń Xalıq qabıllawxanaları, Qaraqalpaqstan Respublikasındaǵı 4 sektor, mámleketlik qáwipsizlik xızmeti,  Jaslar isler agentligi, ministrlik hám mákemelerdiń basshıları tárepinen «Temir dápter» hám «Jaslar dápteri»ne dizimge alınǵan jaslar menen ushırasıw bolıp ótti.

 

Dáslep «Jaslar dápteri»ne dizimge alınǵan jaslar arasında isbilermenlikke qızıǵıwshılıǵı bar bolǵan puqaralarǵa berilip atırǵan múmkinshilikler, rayondaǵı jańa jumıs orınları, Jaslar «1+1» dástúriniń áhmiyeti, biznes joybardı ámelge asırıw hám ajratılıp atırǵan subsidiyalardıń jańa mexanizmi boyınsha interaktiv seminar trening shólkemlestirildi. Sonıń menen birge, kiber jınayattıń aldın alıwǵa baylanıslı videorolik qoyıp berildi.

 

Ushırasıwda jaslardıń mashqalaları, pikir hám usınısları tıńlandı. Óz isbilermenligin baslaw niyetinde bolǵan jaslarǵa jeńilletilgen kreditler ajıratılatuǵın boldı. Sonıń menen birge jumıssız jaslardıń bántligin támiyinlew boyınsha juwapkerlerge tapsırmalar berildi.