08.04.2020, Sárshembi

Ózimizdiń hám jaqınlarımızdıń densawlıǵına itibarlı bolayıq!

        Sońǵı maǵlıwmatlarǵa qaraǵanda Dúnya júzinde tiykarınan Qıtay, Qubla Koreya, Yaponiya, Iran hám Italiya sıyaqlı 100 den artıq mámleketlerde koronavirus infekciyası keń tarqalǵanlıǵı gúzetilmekte. 2020-jıldıń 16-mart kúngi maǵlıwmatlarǵa qaraǵanda, Dunyada koronavirus keselligi menen 163611 adam kesellengeni, 6472 adam kesellik aqıbetinde nabıt bolǵan hám de kesellikten 76059 adam sawalǵan.



COVID-19 infekciyası boyınsha júzege kelgen bunday jaǵday usı keselliktiń mámleketimizge shetten kirip keliwine sebep bolmaqta.

Qaraqalpaqstan Respublikasında keselliktiń respublika aymaǵına kirip keliwiniń aldın alıw boyınsha respublika muwapıqlastırıwshı shtabı shólkemlestirilgen.

Qaraqalpaqstan Respublikası Densawlıqtı saqlaw ministrliginiń buyrıǵına tiykarlanıp koronavirus infekciyasıniń shetten kirip keliwi hám tarqalıwınıń aldın alıw boyınsha jámi 24 qánigeden ibarat koronavirus infekciyası gúman etilgen nawqas anıqlanǵanda háreketleniwshi operativ toparlar barlıq qala hám rayonlarda dúzildi.

Qaraqalapaqstan Respublikası sanitariya-epidemiologiya tınıshlıq orayınıń tapsırması tiykarında barlıq qala hám rayonlarda sanitariya-epidemiologiyalıq tınıshlıq oraylarında jámi 34 qanigeden ibarat 17 dezinfekciya toparları dúzilgen, olar dezinfekciyalaw ushın kerekli ásbap-úskeneler hám dezinfekciyalawshı zatlar menen támiyinlengen.

Sonday-aq, Nókis qalası hám rayonlıq sanitariya-epidemiologiyalıq tınıshlıq oraylarında koronavirus infekciyası boyınsha úgit-násiyat jumısları alıp barıw ushın 106 úgit-násiyat toparları shólkemlestirilgen.

Qaraqalpaqstan Respublikasına juqpalı kesellikler, tiykarınan COVID19 infekciyasınıń kirip keliwiniń aldın alıw maqsetinde, búgingi kúnde mámleket shegaralarında 3 sanitariya-karantin punktleri (SKP) jumıs alıp barmaqta. Respublikadaǵı SKPlarda 3 teplovizor, 8 pirometr, 295 sınaplı termometr, 4 púrkegish úskeneleri, 19 arnawlı qorǵanıw kiyimleri, 3 sınama alıw toplamı, 3 qıstawlı jeke profilaktika toplamları menen támiyinlengen. Is júritip atırǵan barlıq SKPlarda sanitariya-epidemiologiya tınıshlıq orayı qánigeleri hám Respublika juqpalı kesellikler emlewxanası infekcionist shıpakerleri bekitilgen.

Qánigeler tárepinen mámleket shegaraların kesip ótip atırǵan hár bir puxaralardıń dene temperaturaların anıqlaw hám ulıwmalıq salamatlıq jaǵdayın bahalaw jumısları ámelge asırılmaqta. Bunnan tısqarsı kesellik oshaǵında bolıp kelgen hár bir puqaranıń maǵlıwmatları alınıp oraylıq shtabqa 14 kwnlik medicinalıq baqlawǵa alıw ushın jiberilmekte.

Eger respublikamızda koronavirus penen kesellengenler hám olar menen baylanısta bolǵan puqaralar ushın Nókis rayonında 100, Taqiatas rayonında 100 hám Nókis qalasında 250 koykaǵa mólsherlengen orınlar ajratılǵan hám bárshe sharayatlar jaratılgan. Eger kesellik anıqlanǵan nawqas dizimge alınsa Respublikalıq balalar juqpalı kesellikler emlewxanasında 120 orın hám barlıq aymaqlarda 195 orın shólkemlestirilgen.

Jámiyetlik orınlarda hám háreketleniwshi transportlarda dezinfekciyalaw jumısların ótkeriw tiyisli qánigelerge hár 4 saattan ótkeriw tapsırılǵan.

Qaraqalapqstan Respubikası sanitariya-epidemiologiyalıq tınıshlıq orayında jaylasqan virusologiya laboratoriyasında koronavirustı anıqlaytuǵın barlıq reaktivler menen jeterli dárejede táminlengen. 

Keselliktiń aldıń alıw maqsetinde Qaraqalpaqstan Respublikası Sanitariya-epidemiologiyalıq tınıshlıq orayı puqaralardan keselliktiń aldın alıwda jeke gigiena qaǵıydalarına ámel qılıwǵa hám óz densawlıǵına itibarlı bolıwǵa, eger ózińizde koronavirus infekciyası belgilerin sezseńiz emlew profilaktika mekemelerine, aymaqlıq poliklinikalarǵa xabarlasıwıńızdı usınıs etedi.



B.Qutlımuratov

Qaraqalpaqstan Respublikası 

Sanitariya-epidemiologiyalıq tınıshlıq orayınıń bas shıpakeri


Qaraqalpaqstan Respublikası Ministrler Keńesiniń Málimleme xızmeti