24.02.2020, Dúyshembi

Xalıqaralıq sharwashılıq yarmarkası haqqında málimleme

Usı jıldıń 11-fevral sánesinde Nókis qalasında Qaraqalpaqstan Respublikasında násilli sharwanı kóbeytiw, sharwa malların tikkeley shet elden alıp keliw, sonday-aq, sharwashılıqtı rawajlandırıwdı mámleket tárepinen qollap-quwatlaw arqalı sharwashılıq ónimlerin jetilistiriw hám qayta islewde aldınǵı sırt el texnologiyaların engiziw jáne fermer xojalıqları menen awıl xojalıǵı shólkemleriniń materiallıq-texnikalıq bazasın bekkemlew, olardıń islep shıǵarıw potencialın arttırıw maqsetinde Xalıqaralıq sharwashılıq yarmarkası bolıp ótedi.



Ilajdıń ashılıw máresiminde Qaraqalpaqstan Respublikası Joqarǵı Keńesiniń Baslıǵı M.Erniyazov hám “Wzbekcharvonasl” agentliginiń bas direktorı A.Abdullaev jáne Oraylıq bank Qaraqalpaqstan Respublikası bas basqarmasınıń baslıǵı A.Abdikarimovlardıń Ɵzbekstan, sonıń ishinde, Qaraqalpaqstanda sharwashılıq tarawın rawajlandırıwda alıp barılıp atırǵan kólemli jumıslar, sonday-aq, onda sharwashılıq hám fermer xojalıqlarına ajıratılıp atırǵan jeńilletilgen kreditler haqqındaǵı bayanatı tıńlanadı. 

Xalıqaralıq sharwashılıq yarmarkasında Ɵzbekstan Respublikası wálayatları menen Qaraqalpaqstan Respublikası aymaǵında sharwashılıq tarawında jumıs alıp barıp atırǵan hám jańadan shólkemlestirilip atırǵan isbilermenler menen fermer xojalıqlarınıń, sonday-aq,  sırt elli bir qatar sharwashılıq importyor shólkemleriniń óz tovarları hám xızmetleri menen qatnasıwı  kútilmekte.

Atap aytqanda, Vengriya (Hunland), Germaniya (Interboves, Masterrind), Latviya, Shveciya (Delaval), Italiya (Inventa, Pietribiazi), Greciya (Milk plan), Rossiya (Leyli Rus), AQSh (Eco Drip C- Silverleaf BMB, Agro Trade Group) hám Serbiya (Noviy sad) mámleketeriniń iri sharwashılıq hám fermerlik kárxanaları menen shólkemleriniń wákilleri usılardıń  qatarına kiredi.

Xalıqaralıq sharwashılıq yarmarkasında erisilgen nátiyjeler haqqında málimleme berip baramız.

Qaraqalpaqstan Respublikası Ministrler Keńesiniń Málimleme xızmeti