19.09.2020, Shembi

Erteń paytaxtımızda Xalıqaralıq sharwashılıq yarmarkası bolıp ótedi

Aldın xabar bergenimizdey, kúni erteń yaǵnıy 2020-jıldıń 11-fevral sánesinde Nókis qalası Berdaq atındaǵı qaraqalpaq mámleketlik akademiyalıq muzıkalı teatrında Xalıqaralıq sharwashılıq yarmarkası bolıp ótedi.



Qaraqalpaqstan Respublikası  Ministrler Keńesi Málimleme xızmeti usı múnásibet penen yarmarka bolıp ótetuǵın orında bolıp, tayarlıq processleri menen tanıstı.


Áyne payıtta teatr imaratında yarmarkanı joqarı dárejede ótkeriw menen baylanıslı ilajlar qızǵın alıp barılmaqta.


Atap aytqanda, teatr imaratı fasadında Xalıqaralıq sharwashılıq yarmarkasın sáwlelendiriwshi úlken bannerler ildirilip, ishki foede sırt elden keliwshi hám jergilikli sharwashılıq tarawında jumıs alıp barıp atırǵan hám jańadan shólkemlestirilip atırǵan isbilermenler menen fermer xojalıqlarınıń kórgizbeleri ushın arnawlı orınlar tayar halatqa keltirilgen. Sonday-aq, teatr zalınıń úlken led ekranı da shet elden kelgen miymanlar hám jergilikli fermer xojalıqlarınıń óz tovarları menen xızmetlerin elektron kórgizbeli tanıstırıwı ushın  tayar halatta.


Xalıqaralıq sharwashılıq yarmakasına  keliwshi sırt elli qatnasıwshılar haqqında kún dawamında maǵlıwmat berip baramız.


Qaraqalpaqstan Respublikası  Ministrler Keńesiniń Málimleme xızmeti