14.08.2020, Juma

Joqarǵı Keńeste ÓzMTDP frakciyası dúzildi

Ózbekstan “Milliy tiklanish” demokratiyalıq partiyasınan Qaraqalpaqstan Respublikası Joqarǵı Keńesine saylanǵan deputatlardıń frakciyasın dúziw máselesine baǵıshlanǵan shólkemlestiriw májilisi bolıp ótti.



Májiliste Ózbekstan “Milliy tiklanish” demokratiyalıq partiyasınan Qaraqalpaqstan Respublikası Joqarǵı Keńesine saylanǵan deputatlar hám partiyanıń Qaraqalpaqstan Respublikası Keńesi xızmetkerleri qatnastı.

Májilisti partiya Qaraqalpaqstan Respublikası Keńesi baslıǵı Tajibay Romanov kiris sóz benen ashıp berdi hám Ózbekstan “Milliy tiklanish” demokratiyalıq partiyasınan Qaraqalpaqstan Respublikası Joqarǵı Keńesine saylanǵan 14 deputattı erisken jetiskenlikleri menen qutlıqladı hám  alda turǵan áhmiyetli máselelerge toqtalıp ótti.


Atap ótilgenindey deputatlıq lawazım emes, al úlken juwapkershilik. Demokratiyalıq principler tiykarında ótken saylawlarda partiyamız ideyalarına hám talabanlardıń saylawaldı baǵdarlamasına isengen saylawshılar talabanlarımızdı qollap-quwatladı hám  deputatlıqqa múnásip kórdi. Solay eken, joqarı isenim bildirgen xalıqtıń isenimin aqlaw, partiyamızdıń 2020-2024 jıllarǵa mólsherlengen Saylawaldı baǵdarlamasında belgilengen wazıypalardıń ámelge asıwın tolıq támiyinlew, mámleketimizde ámelge asırılıp atırǵan reformalardı bunnan bılay da tereńlestiriwde deputatlarımızdan jankúyerlik kórsetip miynet etiw talap etiledi.

2014-jıldaǵı saylawlarda partiyamızdan bárshe dárejedegi wákillik organlarına jámi 101 deputat saylanǵan bolsa, al 2019-jıl 22-dekabrde bolıp ótken saylawlarda jámi 112 deputat saylanǵanı dıqqatqa ılayıqlı. 


Demek, partiyamız ideyalarına xám deputatlarımızǵa xalıqtıń isenimi artıp barmaqta. Sonday-aq, búgingi kúnde elimizdiń jámiyetlik-siyasiy turmısında hayal-qızlardıń rolin arttırıw boyınsha ámelge asırılıp atırǵan jumıslarǵa dıqqat qaratılıp, Qaraqalpaqstan Respublikası Joqarǵı Keńesine saylanǵan 14 deputattan 6 wı hayal-qızlar ekenligi ayrıqsha atap ótildi.

Bunnan soń kún tártibindegi máselege ótildi hám májilis  qatnasıwshıları Qaraqalpaqstan Respublikası Joqarǵı Keńesinde Ózbekstan “Milliy tiklanish” demokratiyalıq partiyası máplerin qorǵaw maqsetinde partiya frakciyasın shólkemlestiriw máselesin kórip shıqtı.

Qaraqalpaqstan Respublikası Joqarǵı Keńesinde dúzilgen partiya frakciyasınıń baslıǵı wazıypasına Ózbekstan “Milliy tiklanish” demokratiyalıq partiyası Qaraqalpaqstan Respublikası Keńesi baslıǵı, 39-sanlı Aybek saylaw okrugınan saylanǵan deputat Tajibay Romanov usınıldı hám de usınıs qatnasıwshılar tárepinen tolıq qollap-quwatlandı.

Májilis sońında partiya frakciyasınıń “Jol kartası”n islep shıǵıw máseleleri dodalanıp, deputatlardıń bul boyınsha pikir usınısları tıńlandı.

Partiya baspasóz xızmeti