27.01.2020, Dúyshembi

Jańa jıl, jańa nátiyjeler, jańa dáwir

Mámleketimiz turmısında qolǵa kirgizilgen jetiskenlikler hám nátiyjeler bizlerdi jańa maqsetlerge erisiwge iytermeleydi. 2019-jıl bizler ushın,  xalqımız ushın umıtılmas jıl boldı desek asıra aytqan bolmaymız.  Hár  bir tarawda mámleketimizdiń, jaslarımızdıń qolǵa kirgizgen  joqarı nátiyjeleri pikirimizdiń ayqın dáliyli álbette. 



Húrmetli Prezidentimiz Sh.M.Mirziyoev óziniń xalqımızǵa jollaǵan jańa jıl qutlıqlawında da ótip baratırǵan jılda qolǵa kirgizgen jetiskenliklerge ayrıqsha toqtalıp ótti. 

Sonıń menen birge, kirip kelgen jańa 2020-jılda sociallıq-ekonomikalıq tarawlarda keń kólemli reformalardı ámelge asırıw, xalıqtıń turmıs dárejesin jaqsılaw, miynet haqı, pensiya hám stipendiyalardıń muǵdarın kóbeytiw, tálim-tárbiyanıń sapasın arttırıw, xalıqtıń salamatlıǵın bekkemlew, xalıqtıń sociallıq qorǵawǵa mútáj qatlamların qollap-quwatlaw, jeke múlk, isbilermenlik hám biznes ushın qolaylı ortalıq jaratıw, jańa jumıs orınların shólkemlestiriwge ayrıqsha áhmiyet beremiz dep atap ótti. Qaysı taraw iyesi bolıwına qaramastan miynet etken adam ardaqlanbaqta. Jaslarımızdıń bilim hám talantların júzege shıǵarıwları ushın keń imkaniyatlar jaratılıp berilmekte. 

Keyingi úsh jıl ishinde mámleketimizdiń abırayı joqarılap, dúnya jámiyetshiligi tán almaqta. Mámleketimiz demokratiyalıq rawajlanıw jolınan baratırǵanlıǵın 22-dekabr kúni bolıp ótken siyasiy mapazda da óz tastiyǵın kórsetti.

Prezidentimizdiń itibarı hám ǵamxorlıǵınıń nátiyjesinde biziń Moynaq rayonımızda da júdá kóp ózgerisler júz berdi, jańa joybarlar ámelge asırıldı. Búgingi Moynaqqa eki jıl aldın kelgen insan házir kelse tanımay qaladı. Rayonımız shıraylanıp jańa amfiteatr, mádeniyat sarayı, stadionlar, muzeyler, miymanxana, tigiw favrikaları sonday-aq, hákimshilik imaratlar menen kóp qabatlı turaq jaylar boy tikledi.

Pútkil dunyanı táshwishke salıp atırǵan Aral teńizi mashqalasın jumsartıw boyınsha da kóp ilajlar ámelge asırılmaqta. Aral teńiziniń qurıǵan ultanında jasıl qaplamalar  jaratıw maqsetinde ótken 2019-jıl 500 mıń gektar maydanǵa seksewil egildi. 2020-jılda bolsa 700 mıń gektarǵa seksewil egiw jumısları baslap jiberildi.

 Húrmetli Prezidentimizdiń baslaması menen Moynaqta baslanǵan jumıslardıń nátiyjelerin kórip kóz quwanadı. Moynaqlılar turmısında jańa dáwir baslandı. Men usı Watannıń perzenti Moynaqlı ekenligimnen maqtanısh etemen. Usı eldiń, Watanımızdıń rawajlanıwına qoldan kelgenshe óz úlesimdi qosaman. 

 

K.Nasırova

                     Ózbekstan Xalıq demokratiyalıq partiyası Moynaq  rayonlıq  Keńesiniń baslıǵı