27.01.2020, Dúyshembi

Ásker analarına húrmet

Búgin Qaraqalpaq mámleketlik jas tamashagóyler teatrında  Arqa-batıs áskeriy okruginiń baslaması menen Watan qorǵawshıları kúnine baǵıshlanǵan «Ásker anaların ulıǵlaymız» temasında ruwxıy-aǵartıwshılıq ilajı ótkerildi.


Ilajǵa Ózbekstan Respublikasınıń hár qıylı wálayatlarında Watan adındaǵı ádiwli wazıypasın úlgili atqarıp atırǵan bir qatar Qaraqalpaqstanlı ásker-jigitlerdiń anaları qatnastı hám olar Nókis garnizonı ruyxıylıq-aǵartıwshılıq orayınıń áskeriy orkestri jámááti tárepinen saltanatlı túrde kútip alındı.


Keshede Qaraqalpaqstan Respublikası Ministrler Keńesi Baslıǵınıń orınbasarı – Respublika Hayal-qızlar komitetiniń baslıǵı Z.Ibragimova hám Arqa-batıs áskeriy okrugi áskerleri sárkardasınıń tárbiyalıq hám ideyalogiyalıq isler boyınsha orınbasarı, podpolkovnik N.Kadirov shıǵıp sóylep, húrmetli analardı Ózbekstan Respublikası Qurallı Kúshleri shólkemlestirilgeniniń 28 jıllıǵı hám 14-yanvar – Watan qorǵawshıları kúni menen shın-júrekten qutlıqladı hám olardı bahalı sawǵalar menen sıylıqladı.


Ilaj Nókis garnizonı ruyxıylıq-aǵartıwshılıq orayı áskeriy orkestri jámááti hám qaraqalpaq estrada qosıqshılarınıń koncert baǵdarlaması menen dawam etti.


Maǵıwmat ornında atap ótiw orınlı, bul ilaj Ózbekstan Respublikası Prezidentiniń 2019-jıl 13-dekabrdegi «Ózbekstan Respaublikası Qurallı Kúshleri shólkemlestirilgeniniń 28 jıllıǵı hám Watan qorǵawshıları kúnin belgilewge tayarlıq kóriw hám ótkeriw ilajları haqqında»ǵı F-5529-sanlı biyligin orınlaw sheńberinde ámelge asırılmaqta.

Qaraqalpaqstan Respublikası Ministrler Keńesiniń Málimleme xızmeti