08.12.2019, Ekshembi

Áhmiyetli ilajǵa baǵıshlandı

Qaraqalpaqstan Respublikası Turaq jay kommunallıq xızmet kórsetiw ministrligi tárepinen «Xalıqtı sapalı ishimlik suwı menen támiyinlewdi jaqsılaw boyınsha ámelge asırılıp atırǵan jumıslar hám kelesi jıllar rejeleri haqqında» baspasóz konferenciyası bolıp ótti. Oǵan taraw qánigeleri hám ǵalaba xabar qurallarınıń xızmetkerleri qatnastı. 


Ilajdı Qaraqalpaqstan Respublikası Ministrler Keńesi Baslıǵınıń baspasóz xatkeri Ch.Elmuratov basqarıp bardı. Onda «Túyemoyın-Nókis» regionallıq suw tarmaǵınan paydalanıw basqarması MUK direktorı wazıypasın atqarıwshı M.Uteniyazov, Qaraqalpaqstan Respublikası Turaq jay kommunallıq xızmet kórsetiw ministrliginiń basqarma baslıǵı N.Sultanovlar shıǵıp sóylep, respublikamızda xalıqqa taza ishimlik suwın jetkerip beriw hám kanalizaciya qubırların jańalaw baǵdarında júrgizilip atırǵan jumıslarǵa ayrıqsha toqtap ótti. 


Ilajda atap ótilgenindey, elimizde júrgizilip atırǵan «Abat awıl» baǵdarlaması sheńberinde xalqımızǵa taza ishimlik suwın jetkerip beriwde nátiyjeli jumıslar ámelge asırılmaqta. Atap aytqanda, Ellikqala rayonındaǵı «Shuqırqaq» APJ, Tórtkúl rayoındaǵı «Jambasqala» hám «Nawrız» APJ, sonıń menen birge, Taxtakópir rayonınıń alıs aymaqlarında jaylasqan suw jetkerip beriwshi obektlerge rekonstrukciya jumısları júrgizilip, sapalı ishimlik suwı menen támiyinlendi. Jetkerilip berilgen ishimlik suwdıń bahası bir sum etip belgilengen. Álbette, bul ilajlar Húkimetimiz tárepinen jaratılǵan jeńilliklerdiń biri esaplanadı. 


­ Kárxanamız tiykarınan xalıqqa taza ishimlik suwın jetkerip beriw hám aqaba suwlardı alıp shıǵıw menen shuǵıllanadı, ­ deydi «Túyemoyın-Nókis» regionallıq suw tarmaǵınan paydalanıw basqarması MUK direktorı wazıypasın atqarıwshı M.Uteniyazov. ­ Búgingi kúnde respublikamızdıń 60 procenti oraylastırılǵan taza ishimlik suwı menen támiyinlengen. Aldaǵı waqıtları bul jumıslardı ele de jetilistiriw hám zamanagóy suw jetkerip beriw úskenelerin ornatıw rejelestirilmekte.  


Konferenciya qatnasıwshıları puqaralarımız arasında ishimlik suwlarınan nátiyjeli paydalanıw hám suw esaplaǵısh úskenelerin ornatıw mádeniyatın jetilistiriw boyınsha da pikir-usınısların bildirdi. Ilaj sońında jurnalistler ózlerin qızıqtırǵan sorawlarǵa qánigelerden juwap aldı. 


A.ORAZOV.

SÚWRETTE: ilajdan kórinis.