08.12.2019, Ekshembi

Belgiyalı professor menen tájiriybe almasıldı

Usı jıldıń 2-dekabr kúni Belgiyanıń Vredji universitetiniń professorı Xans De Volf Ózbekstan mámleketlik kórkem óner hám mádeniyat institutı Nókis filialında miymanda boldı.  


Dáslep delegaciya aǵzaların filial keń jámiyetshilik wákilleri saltanatlı túrde kútip aldı. Ásirese, filial student jasları tárepinen tayarlanǵan koncert baǵdarlaması olarda ayrıqsha tásir qaldırdı.  

Bunnan soń professor-oqıtıwshılar hám student jaslardıń qatnasında ushırasıw bolıp ótti. Ilajda Ózbekstan mámleketlik kórkem óner hám mádeniyat institutı Nókis filialı direktorı Paxratdin Paluaniyazov joqarı dárejedegi miymandı respublikamızǵa bolǵan saparı menen qutlıqladı. Sonday-aq, elimizde mádeniyat hám kórkem óner tarawın rawajlandırıw baǵdarında júrgizilip atırǵan jumıslarǵa ayrıqsha toqtap ótti. 


Óz gezeginde, Belgiyalı professor jıllı júzlilik penen kútip alǵanı ushın jámáát aǵzalarına  óz minnetdarshılıǵın bildirdi. Sonıń menen birge,  ilim-bilimlendiriw hám kórkem óner tarawın jetilistiriwde rawajlanǵan mámleketler tájiriybesi haqqında qatnasıwshılar menen pikir alıstı.  


Sońınan Ózbekstan mámleketlik kórkem óner hám mádeniyat institutı Xalıqaralıq bólim baslıǵı Sardar Sheraliev professor-oqıtıwshılar hám student jaslardıń bilimin arttırıwda bunday joybarlardı ele de jetilistiriw boyınsha óziniń pikir-usınısların bildirdi. 


- Elińizge birinshi márte keliwim deydi, ­ professor Xans De Volf.  ­ Xalqıńız júdá miymandos eken. Bul jerde oqıp atırǵan student jaslardıń kórkem óner tarawına bolǵan qızıǵıwshılıǵın kórip quwandım. Álbette, bul jaslar mádeniyat tarawın rawajlandırıwda óz úleslerin qosadı dep oylayman...    


Ilaj sońında miymanlarǵa I.V.Savickiy atındaǵı kórkem-óner muzeyi hám basqa da tariyxıy orınlarǵa sayaxat shólkemlestirildi.  

H.Tursınbaeva, 

ÓzMKÓMI Nókis filialı baspasóz xızmeti.