08.12.2019, Ekshembi

Bálentlerdi gózlegen Qońırat

Búgingi kúnde Respublikamızdıń barlıq rayonları qatarı Qońırat rayonında da úlken ózgerisler júz bermekte. Ol agrar tarawı bolama, bilimlendiriw yaki sport tarawı bolama úlken alǵa ilgerilewlerdi kóriwimiz múmkin. Bunday ózgerisler tek rayonımız kelbetin ózgertip ǵana qoymastan xalqımızdıń erteńgi kúnine isenimin arttırarı sózsiz.


Ózgerislerdi tek  rayonımız orayında emes, al uzaq-uzaq awıllarında da  kóriwimiz múmkin. Bulardıń barlıǵı  awıllarımızdıń  qalalar  menen teńdey rawajlanıp, básekilesip atırǵanlıǵınan derek beredi.


Prezidentimizdiń «Abat awıl» baǵdarlaması tiykarında rayonımızda úlken kólemdegi jumıslar ámelge asırılmaqta. Bunıń ayqın dáliyli sıpatında rayonımızdaǵı «Qońırat», «Miynetabat» hám «Súwenli» awıl puqaralar jıyınları aymaqlarındaǵı xalıqtı ekonomikalıq hám sociallıq jaqtan rawajlandırıw, xalıqtıń turmıs dárejesin jaqsılaw hám olarǵa qolaylıqlar jaratıw maqsetindegi islenip atırǵan jumıslardı atap ótsek arzıydı.  «Qońırat» awıl puqaralar jıyını aymaǵındaǵı 10-sanlı mektep imaratı,19-sanlı mektepke shekemgi bilimlendiriw mákemesi imaratı, «Miynetabat» awıl puqaralar jıyını aymaǵındaǵı 55-sanlı mektep imaratı,1-sanlı mektepke shekemgi bilimlendiriw mákemesi imaratı  sonday-aq, «Súwenli» awıl puqaralar jıyını aymaǵındaǵı 22-sanlı mektepke shekemgi bilimlendiriw mákemeleriniń imaratları tolıq rekonstrukciyalanıp paydalanıwǵa tapsırıldı. 

Xalqımızdıń «Jol qurǵan sawapqa qalar» degenindey rayonımız aymaǵında ishki jollar qurılıslarına da úlken itibar qaratılıp kelinbekte. Rayonımız aymaǵında 2019-jıl ishki xojalıqlararalıq avtomobil jolların ońlaw baǵdarlaması tiykarında rayon aymaǵında jámi 19 obekt boyınsha bahası 1milliard 748 million sum bolǵan  11 km 480 metr aralıqtaǵı ońlaw jumısları belgilenip 10 km 440 metr aralıqtaǵı jumıs kólemi orınlandı hám qalǵan 1 km 40 metr aralıqtaǵı jumıs kólemi usı jıl aqırına shekem orınlanıwı rejelestirilgen. 


Keyingi jılları rayonımızda isbilermenliktiń qollap-quwatlanıwı nátiyjesinde tayar ónim islep shıǵarıw aldınǵı jıllarǵa qaraǵanda bir qansha ósti. Bul óz gezeginde elektr energiyası, tábiyiy gaz hám ishimlik suwına bolǵan talaptıń ósiwine alıp keledi hám bul boyınsha da aytarlıqtay jumıslar alıp barılıp atır.

Atap aytqanda, rayonımızdaǵı «Qashı» mákan puqaralar jıyını aymaǵındaǵı uzınlıǵı 1582 metr bolǵan, «Xanjap» mákan puqaralar jıyını aymaǵındaǵı uzınlıǵı 1130 metr bolǵan ishimlik suw trubalarına rekonstrukciya jumısların alıp barıw ushın 1milliard 562 million sum qarjı ajıratılıp  qurılıs jumısları dawam etip atır. «Miynetabat» awıl puqaralar jıyını aymaǵında uzınlıǵı 13 km bolǵan ishimlik suw turabaları jańadan tartıldı.

Xalıqtıń elektr energiyasına bolǵan talabın qanaatlandırıw maqsetinde 6,2 km aralıqtaǵı elektr tarmaqların qayta rekonstrukciyalaw, 3,8 km aralıqta elektr liniyalarına iri ońlaw, 2 dana transformator punktlerin rekonstrukciyalaw jumısların alıp barıw belgilendi. Házirgi waqıtta bul baǵdardaǵı jumıslar dawam etip atır. Bul baǵdardaǵı jumıslar Qońırat rayonı elektr támiyinlew kárxanası tárepinen alıp barılmaqta.

Jıl basında dúzilgen rejege muwapıq 12 dana gaz benen támiyinlew     punktleri (GRP) hám 10.5 km gaz tarmaqlarına ońlaw jumısların alıp barıw jobalastırılǵan edi. Házirgi kúnge kelip 12 dana gaz benen támiyinlew  punktleri tolıq texnikalıq tekseriwden ótkerildi hám 9,1km gaz tarmaqlarına ońlaw jumısları alıp barılılmaqta. 


Rayonımızda 2019-2020-jıllar dawamında 78 milliard 110 million sumlıq 43 investiciyalıq joybarlar ámelge asırılıwı belgilengen. Házirgi kúnge kelip 30 joybar ámelge asırılǵan bolıp 22 milliard 757 million sumlıq investiciyalar ózlestirildi hám 104 jańa jumıs orınları jaratıldı. Bunnan basqa shet el investiciyaları tiykarında ámelge asırılatuǵın joybarlar boyınsha da bir qansha jumıslar ámelge asırılıp atır. 21-oktyabr kúni rayonımız hákimi B.Saparov Qıtay Xalıq respublikasınıń «Shandong Zhongitan Technology & Engineering LTD» kompaniyası basqarıwshısı Yang Decheng penen ushırasıp rayonımızdaǵı «Qońırat soda zavodı» juwapkershiligi sheklengen jámiyeti menen birgelikte qospa kárxana ashıp kalciy gipoxloridi hám kaustika sodası ónimlerin islep shıǵarıwdı ámelge asırıw boyınsha sóylesiwler júrgizdi. Joybar biznes rejesinde kórsetilgen jumıslar jolǵa qoyılsa, import ornın basatuǵın hám eksportqa shıǵarılatuǵın ónimler islep shıǵarıw rejelestirilgen. 


Natriy sulfatın islep shıǵarıwdı keńeytiriwge mólsherlengen investiciyalıq joybar tiykarında “Ustyurt sodium sulfat” kárxanası da iske tústi. Bul Investiciyalıq joybardıń ulıwma bahası 873,3 million sum bolıp, jılına 5 mıń tonna natriy sulfatın qayta islep óndiris ushın tayar ónimge aylandıradı.   Karxana 2019-jıl may ayında óz jumısın basladı hám 15 puqaranı jumıs penen támiyinledi.


Ótken jıllar dawamında xalıq xojalıǵınıń barlıq tarawları sıyaqlı bilimlendiriw salasında da kóp ǵana unamlı ózgerisler júz berip atırǵanı hámmege málim.

Búgingi kúnde Qonırat rayonı xalıq bilimlendiriw bólimine qaraslı 49 bilimlendiriw mákemesi  bolıp, olardan 48 ulıwma orta bilim beriw mektepleri hám Bárkamal áwlad balalar orayı xızmet kórsetip kelmekte. Ulıwma bilim beriw mekteplerindegi 23507 oqıwshılarǵa 2307 oqıtıwshı tálim-tárbiya berip kelmekte.

2018-2019- oqıw jılında 9-klasslarda  2074 oqıwshıdan 115 oqıwshı ayrıqsha túrdegi shaxadatnamalar  hám 11-klass pitkeriwshi  900 oqıwshıdan 18 oqıwshı altın hám 18 oqıwshı gúmis medal menen pitkerdi. Hár jılı ótkeriliwi dástúrge aylanǵan ulıwma bilim beriw mektepleriniń 9-10-11-klass oqıwshıları arasında «Pánler olimpiadası»nıń Qaraqalpaqstan Respublikası basqıshında 11 oqıwshı sıylı orınlardı iyelep Ózbekstan Respublikası basqıshına qatnasıw ushın jollamalar aldı.

2019-jıl 8-11-iyun kúnleri ulıwma orta bilim beriw mektepleri, akademiyalıq licey hám kásip-óner kolledjleri oqıwshıları arasında ulıwma tálim pánleri boyınsha ótkerilgen Respublika pánler olimpiadasınıń IV basqıshında 21-sanlı mekteptiń 11-klass oqıwshısı Orınbaeva Balnura qazaq tili hám ádebiyatı páni boyınsha 1-orındı iyelep joqarı oqıw ornına imtixansız kiriw baxtına miyassar boldı.

Bárshege belgili, mámleketimizde jas áwlad tárbiyasına úlken itibar qaratılıp kelinbekte, sebebi búgingi balalar erteńgi kúnimizdiń dawamshıları, keleshegimizdiń qanday bolıwı búgingi jas áwlattıń qanday tárbiya, bilim alıwına baylanıslı. Sol ushın da Húkimetimiz tárepinen jaslarımızdıń tereń bilim alıwı, olardıń intellektuallıq talantın rawajlandırıw hám qollap-quwatlaw ushın barlıq qolaylıqlar jaratılmaqta.

Respublikamızda Prezidentimizdiń tapsırması menen shólkemlestirilgen “Prezident mektebi”ne rayonımızdan 7 oqıwshı qabıllandı. Bul rayonlıq xalıq bilimlendiriw tarawınıń úlken jetiskenligi bolıp esaplanadı.


Sonıń menen bir qatarda rayonımız aymaǵında mektepke shekemgi bilimlendiriw mákemelerine de úlken itibar qaratılıp kelinbekte. Atap aytqada rayonımızdaǵı “Qońırat” mákan puqaralar jıyını aymaǵında “DISNEY” mámleketlik sherikshilik tiykarındaǵı 50 orınǵa mólsherlengen balalar baqshası, sonday-aq, “Elabat” posyolka puqaralar jıyını aymaǵınan 100 orınǵa mólsherlengen “ZOLOTAYA RIBKA” mámleketlik  sheriklik tiykarındaǵı balalar baqshaları óz jumısların basladı. Bul mektepke shekemgi bilimlendiriw mákemelerinde balalar ushın barlıq shárayatlar jaratılǵan bolıp, bunday zamanagóy mektepke  shekemgi bilimlendiriw shólkemlerinde tálim-tárbiya alǵan keleshegmiz iyeleriniń ertengi kúni jámiyetimiz ushın paydalı insanlar bolıp jetilisiwine isenemiz.


Rayonımızdaǵı Barkamal áwlad balalar orayında shólkemlestirilgen dógereklerde intellektual hám innovacion qábilietli balalar jetilisip shıqpaqta. Atap aytqanda;- Barkamal áwlad balalar orayı “Radio-texnika” dógeregi aǵzası rayondaǵı 36-sanlı mektep oqıwshısı Barlıqbaev Berdiyar Qubla Koreya mámleketinde ótkerilgen «Baslanǵısh texnikalıq modellestiriw» atamasındaǵı xalıqaralıq tańlawǵa Ózbekstan Respublikası saylandı komandası quramında qatnasıp eń joqarı orın «Gran-Pri» jeńimpazı boldı hám 2020-jılı Rossiya federaciyasınıń Moskva qalasında bolıp ótetuǵın “Robototrek” xalıqaralıq tańlawına qatnasıw huquqın beriwshi sertifikattı qolǵa kirgizdi. 


2019-jıl aprel ayında Ózbekstan Respublikası shegara aymaqlarında jaylasqan rayonlardıń ulıwma orta bilim beriw mektepleri hám kásip-óner kolledjleri oqıwshıları arasında ótkerilgen “Jas shegarashılar” áskeriy watan súyiwshilik ruwxındaǵı kórik tańlawında 35-sanlı mekteptiń “Amir Temur áwladları” komandası Qaraqalpaqstan Respublikasında 1-orındı jeńip alıp, 

2019-jıl may ayında Tashkent wálayatı Shırshıq qalasında ótkerilgen Ózbekstan Respublikası kólemindegi baskıshqa belsene qatnasıp qayttı.

   Sport baǵdarındaǵı bir qansha jarıslarǵa rayonımız jasları belsene qatnasıp joqarı orınlardı iyelep kelmekte. Atap aytqanda, sporttıń basketbol túrinen er hám qız balalar komandaları Qarakalpaqstan Respublikası basqıshında 3-orındı iyelegen bolsa, futbol boyınsha 2-orındı iyelewge eristi. 


2019-jıl 15-27-avgust kúnleri aralıǵında sporttıń “Shotakan karate-do” túri boyınsha Yaponiyanıń Tokio qalasında ótkerilgen XIV Jáhán chempionatında 

55-sanlı mektep oqıwshısı Bayramov Quwanısh Bayram ulı múnásip qatnasıp sıylı 2-orındı jeńip aldı.

Sonday-aq sporttıń belbewli gúres túri boyınsha  Tashkent qalasında  jas óspirimler hám qızlar arasında  8-11-avgust kúnleri aralıǵında ótkerilgen  Jáhán chempionatında  48-sanlı mektep oqıwshısı Esbergenova Malika múnásip qatnasıp sıylı 3-orındı iyeledi.

          Rayonımız xalqına búgingi kúnde rayonlıq medicina birlespesi, 1 awıllıq   shıpakerlik punkti, 7 awıl shıpakerlik poliklinikaları hám birlemshi  medicinalıq sanitariyalıq mákemeler xızmet kórsetip kelmekte. 2019-jıl yanvar ayınan baslap kóp tarmaqlı poliklinika quramında balalar stomotologiya bólimi jumıs basladı. 


Sonday-aq, «Qırıq qız» posyolka puqaralar jıyını aymaǵında ǵárezsizlik bayramı qarsańında 70-sanlı shańaraqlıq poliklinikası paydalanılıwǵa tapsırıldı. Bul poliklinika eń sońǵı zamanagóy UZI apparatı, rentgen apparatı hám tiyisli ásbap-úskeneler menen támiyinlengen.2020-jılı rayonımızdaǵı eski balalar poliklinikası ornına jańadan Perinital oray ashıw rejelestirilgen.


Keyingi waqıtları rayonımız  hákikmshiligi tárepinen qabıl etilgen fizikalıq hám yuridikalıq shaxslardıń múrajatları óz waqıtında unamlı sheshimlerin tawıp kelmekte. Jıl basınan berli 652 múrájat kelip túsken bolsa 283-múrájat unamlı sheshildi,351 múrajat boyınsha túsindiriw jumısları alıp barılıp hám18 múrájat kórip shıǵılmaqta.

Prezidentimizdiń 2018-jıl 27-iyun kúngi PP-5466 sanlı pármanı tiykarında  «Jaslar keleshegimiz» baǵdarlamasınıń orınlanıwın támiyinlew boyınsha jumsshı topar dúzildi. Jumısshı topar tárepinen jas isbilermenlerdiń biznes rejeleri úyrenilip shıǵılıp 12 jas isbilermenlerge jámi 5 milliard 555 million sum muǵdarında jeńilletilgen kreditler ajıratıldı. Házirgi kúnde jas isbilermenlerimiz ózleriniń jumısların jolǵa qoyıp 35 puqaranı jumıs penen támiyinledi.

Atap aytqanda jas isbilermen Qalenderov Islam  Akfa ayna hám esikler, temir buyımların preslewshi úskeneler komplektin satıp alıw ushın 500 million sum muǵdarında kredit alıp   «AGRO STROY KUNGRAD» juwapkershiligi sheklengen jámiyetin dúzip, 8 jańa jumıs ornın jarattı. Jas isbilermen Jańabaev Murat mebel islep shıǵarıw úskenelerin satıp alıw ushın 380 million sum muǵdarında kredit alıp «Evrika Kungrad» juwapkershiligi sheklengen jámiyetin dúzip, 4 jańa jumıs ornın jarattı. 


           Sonday-aq, Jas isbilermen Yuldashbaev Kóbeysin  medicinalıq xızmetler kórsetiw úskenelerin satıp alıw ushın 550 million sum muǵdarında kredit alıp rayonımızdaǵı Qońırat mákan puqaralar jıyını aymaǵınan «Soǵlom Yurak Klinikasi» juwapkershiligi sheklengen jámiyetin ashtı hámi 10 jańa jumıs ornın jaratıp  xalqımızzǵa xızmet kórsetip kelmekte. 


            Juwmaqlap aytqanda mámleketimiz tárepinen jaratılıp berilgen bunday  úlken imkániyatlardan rayonımız xalqı únemli paydalanıp, elimizdiń gúllep rawajlanıwı ushın óz úlesin qosıwına isenip qalamız.          


                                                                                                                                  Qaraqalpaqstan Respublikası Ministrler Keńesiniń Málimleme xızmeti

.