08.12.2019, Ekshembi

“Qarawsız qalǵan daraqlar”ǵa hákimliktiń rásmiy juwabı

Nókis qalası Kızketken elatı aymaǵınan ótiwshi A-380 «Guzar-Buxara-Nókis-Beynew» xalıqaralıq áhmiyettegi avtomobil jolınıń   766-767-kilemetri boyındaǵı daraqlardıń qarawsız qaldırılǵanlıǵı boyınsha “Ustaz jolı” gazetasında járiyalanǵan “Qarawsız qalǵan daraqlar” atamasındaǵı sın maqalaǵa múnásibet retinde tómendegilerdi málim etip bildiremiz.



Ózbekstan Respublikası Prezidentiniń 2017-jıl 11-sentyabrdegi PQ-3262-sanlı qararı tiykarında mámleketimiz aymaǵında avtomobil jolları boyların kóklemzarlastırıw jumısların jetilistiriw maqsetinde “Avtomobil jollarınıń arxitektura-landshaft konstrukciyası hám abadanlastırıw sistemasın jetilistiriw is-ilajları haqqında”ǵı qararı qabıl etilgen edi. Usı qarar tiykarında “Qoraqalpoqywlkwkalam” unitar kárxanası shólkemlestirildi. Bul kárxananıń wazıypaları tiykarınan ulıwma paydalanıwdaǵı avtomobil jolları boyların kóklemzarlastırıw jumısları quraydı. 

Joqarıdaǵı maqalada sóz etilgen Nókis qalası Kızketken elatı aymaǵınan ótiwshi A-380 «Guzar-Buxara-Nókis-Beynew» xalıqaralıq áhmiyettegi avtomobil jolınıń 766-767-kilemetri boyındaǵı daraqlardıń bunnan           30-35 jıllar burın egilgenligi, búgingi kúnge kelip, bul tereklerdiń tárbiyası hám basqa da átirapların kóklemzarlastırıw jumısları “Qoraqalpoqywlkwkalam” unitar kárxanası tárepinen ámelge asırılıwı belgilengen. Kelesi 2020-jıldıń báhár máwsiminde A-380 «Guzar-Buxara-Nókis-Beynew» xalıqaralıq áhmiyettegi avtomobil jolınıń 766-767-kilometri boyındaǵı daraqlardı saqlaw jumısları, qosımsha jańa terek nálleri egiliwi hám suwǵarıw jumıslarındaǵı mashqalalardı saplastırıw is-ilajları mánzilli baǵdarlamaǵa kirgizilgen.

Bıyılǵı 2019-jıl esabınan bul aymaqtı suwǵarıw jumısları boyınsha smeta-joybar hújjetleri tolıq tayarlanıp, házirgi kúnde zamanagóy suwǵarıw sistemasın, yaǵnıy, jer-qudıqların (skvajina) iske túsiriw boyınsha tiyisli jumıslar baslanıw aldında tur.

Qaraqalpaqstan Respublikası Ministrler Keńesiniń Málimleme xızmeti