22.11.2019, Juma

Shımbay aydın keleshekke qaray

Paraxatshılıq bolǵan jerde ǵana alǵa ilgerilew boladı. Álbette, bunı ǵárezsiz mámleketimiz    ekonomikasınıń     turaqlı rawajlanıp, respublikamızdıń barlıq aymaqlarında     úlken     qurılıs    hám abadanlastırıw jumıslarınıń basqıshpa-basqısh dawam etip atırǵanlıǵında da kóremiz. Húrmetli  Prezidentimiz tárepinen alıp barılıp atırǵan ádil siyasat, uzaqtı kóre biliw, xalqımızǵa bolǵan ayrıqsha itibar, ásirese, hesh nárse menen teńlestirip bolmaytuǵın tınıshlıq arqasında elimiz ekonomikası tez pát penen rawajlanıp atırǵan mámleketke aylanbaqta. Bul óz gezeginde hár bir insannıń ómirge degen muhabbatın, kúsh-jigerin arttırıp, xalqımızdıń abadan hám párawan turmısta jasawın támiyinleydi.


    Solardıń qatarında  Shımbay rayonımızda bir qatar unamlı ózgerislerdiń gúwası bolmaqtamız. Atap aytqanda, 2019-jıl 9 ayı dawamında sanaat ónimlerin islep shıǵarıw kólemi 196,7, tutınıw tovarların islep shıǵarıw kólemi 114,2, awıl xojalıǵı ónimlerin islep shıǵarıw kólemi 103,0, qurılıs jumısları 142,2, kótere sawda hám xızmetler kórsetiw kólemi 202,2 procentke ósiwine eristik.
Isbilermenlik tarawın hámde kishi biznesti ele de rawajlandırıw maqsetinde kommerciyalıq bank filialları tárepinen 66 mlrd. sum kreditler ajıratılıp, olardıń jumısların ele de keńeyiwine imkániyat jaratıldı. Sonıń menen birge jańa jumıs orınların jaratıw, shańaraq isbilermenligin rawajlandırıw, jaslardıń óz isbilermenlik jumısların baslawı ushın 26,1 mlrd. swm jeńilletilgen payız esabınan kreditler ajıratılıp berildi.


Rayondı sociallq-ekonomikalıq jaqtan rawajlandırıw baǵdarlamasına muwapıq bıyılǵı jılda 22,8 mlrd.swmlıq 49 joybar ámelge asırıw belgilep alındı.
Shımbay rayonında investiciya baǵdarlamasına  muwapıq 29 obektte jámi 16 mlrd. 55 mln. sumlıq qurılıs hám ońlaw jumısların alıp barıw rejelestirilgen bolıp sonnan, 4 dana sociallıq taraw obektlerin qurıw hám rekonstrukciya jumısları hámde xalıqtı tirishiligimizdiń deregi bolǵan taza ishimlik suwı menen úzliksiz támiyinlew maqsetinde bıyılǵı jıldıń ózinde baǵdarlamaǵa muwapıq 13,5 kilometr ishimlik suw tarmaǵın jańadan tartıw, 1 nasos stanciyasın rekonstrukciya qılıw jumıslarına 3 mlrd. 801 mln. swm muǵdarında qarjı ajıratıldı hám búgingi kúnde usı jumıslar tolıq juwmaqlandı.


Húrmetli Prezidentimizdiń 2018-jılı 15-16-noyabr kúnleri Qaraqalpaqstan Respublikasına bolǵan xızmet saparı dawamında belgilep berilgen wazıypalar hám keńeytirilgen tárizde ótkerilgen májilis bayanlamasına muwapıq rayon orayınan ótiwshi “Nukus-Taxtakupir” avtomobil jolın 5,4 km aralıǵın keńeytiw jumıslarına jámi smeta baxası 42 mlrd. swmlıq rekonstrukciya jumısların júrgiziw rejelestirilgen. Házirgi kúnde 2019-jıl ushın 2 mlrd. swm qarjı qaratılıp, 1 mlrd. 100 mln. swmlıq jumıs kólemi orınlandı.


Sonday-aq, ishki xojalıq avtomobil jolların ońlaw boyınsha bıyılǵı jıl ushın 8 mlrd. swmnan aslam qarjı ajıratılıp, bunıń esabınan 6,3 kilometr uzınlıqtaǵı ishki xojalıq jollarında ońlaw jumısları alıp barılmaqta. Sonıń menen birge rayon aymaǵında ońlaw jumısları alıp barılatuǵın hám tazadan asfalt jolların tartıw boyınsha isleniwi tiyis jumıslarımız ele de kóp hám bul jumıslardı aldaǵı waqıtlarda basqıshpa-bashqısh ámelge asırıw rejelestirilgen.


    Sonı ayrıqsha atap ótiw tiyis  Ózbekstan Respublikası Prezidentiniń 2019-jıl 20-fevraldaǵı “Abat awıl” baǵdarlamasın 2019-jılda ámelge asırıw boyınsha qosımsha ilajlar haqqındaǵı qararı tiykarında Shımbay rayonında 3 aymaqta yaǵnıy “Qamıs-arıq”, “Baxıtlı”, “Kókshi qala” mákan hám awıl puqaralar jıyınlarında qurılıs-ońlaw jumısların alıp barıw belgilengen. Usı aymaqlarda byudjet qarjıları esabınan 6 sociallıq taraw obektlerinde 10 mlrd. sumnan aslam iri ońlaw hám rekonstrukciya jumısları, aymaqta jasawshı xojalıqlardı taza ishimlik suwı menen támiyinlew maqsetinde 10 kilometr ishimlik suw tarmaǵın tartıw jumısları, 21 kilometr ishki avtomobil jolların ońlaw hám 22,6 kilometr uzınlıqtaǵı elektr tarmaqların modernizaciyalaw jumısları 16,8 kilometr gaz tarmaqlarına ońlaw jumısları,  sonday-aq  6,3 km aralıqqa keshki jaqtılandırıw úskenelerin ornatıw jumısları, 4,5 km aralıqqa piyadalar jolların qurıw, 13 km ishki irrigaciya, 14,8 km melioraciya tarmaqların tazalalaw hámde dástúrge kiritilgen aymaqlardaǵı 106 jeke tártiptegi turaq-jaylardıń tóbesin ońlaw, 83 turaq-jaylardıń fasad kórinislerin jaqsılaw, 32 turaq-jaylardıń qorǵanshaların ońlaw jumısları tolıq juwmaqlanıp, jámi 19,8 milliard swmlıq jumıslar ámelge asırıldı.


    Sociallıq tarawdı rawajlandırıw hám jaslarımızdıń  baslamaların bunnan bılay da qollap-quwatlaw boyınsha da bir qatar unamlı jumıslar dawam etpekte. Olardıń isbilermenlik háreketin jolǵa qoyıw, bántligin támiyiyinlew maqsetinde «Jaslar keleshegimiz» mámleketlik baǵdarlaması tiykarında bıyılǵı jılda 5 isbilermen jaslarımızǵa 730 mln. swm muǵdarında jeńilletilgen kreditler ajıratıldı  hám  20 jańa jumıs orınları jaratılıp jaslardıń bántligi támiyinlendi. Sonıń menen bir qatarda jas isbilermen Shrazov Dauranǵa “Jaslar miynet gúzarı” hám “Jaslar kovorking oray”ın shólkemlestiriw, jaslardı miynet qatnasıqlarına keńnen tartıw maqsetinde investiciyalıq hám sociallıq májbúriyatlardı qabıl qılıw shárti menen “nol” bahada imarat berildi.


Sonday-aq, Ǵárezsizligimizdiń 28 jıllıǵı múnásibeti menen «Kókshi qala»  mákan puqaralar jıyında  jańadan 16 shańaraqqa mólsherlengen turaq jaylar tiykarınan rayondaǵı imkaniyatı sheklengen, sociallıq járdemge mútáj bolǵan shańaraqlarǵa, jalǵız baslı kekselerge, sonıń  menen birge, jámiyetlik turmıstıń túrli tarawlarında belsendilik kórsetip atırǵan jas shańaraqlarǵa inam etildi.


Rayonda mektepki shekemgi bilimlendiriw mákemelerini de joqarı itibar qaratılıp, aymaqta zaman talabına say  balalar baqshaları boy tiklemekte. Mine, solardıń biri 150 orınǵa mólsherlengen mámleketlik jeke sheriklik tiykarındaǵı Progress leon kids balalar baqshası bolıp tabıladı. Sonday-aq, “Qarakól” mákan puqaralar jıyınındaǵı "Teremok" balalar baqshası da búgingi kúni baxıtlı balalardıń súyikli orayına aylanǵan.




Sonıń menen birge, rayon orayında Balalar hám jas-óspirimler sport mektebine karaslı 25x11 kólemde "Balalar júziw basseyni" jumıs alıp barmaqta. Házirgi waqıtta bul basseynde 1 trener 45 bala menen turaqlı shuǵıllanıp kelmekte.


Bárińizge belgili bolǵanınday, ótken jılı rayonımızdaǵı "Tazǵara" awıl puqaralar jıyınında  qaraqalpaq ádebiyatınıń úlken bayterekleeri Kúnxoja hám Berdaq  shayırlardıń, sonday-aq, qaraqalpaq baqsıshılıq mektebiniń tiykarın salıwshısı Aqımbet baqsınıń  húrmetine mavzoleyler  qurıp pitkerilip, bul kompleks házigi kúnde xalqımızdıń hám elimizge kelip atırǵan miymanlardıń súyikli orayına ayandı. Kompleks átirapında bir qansha abadanlastırıw jumıslar alıp barılıp, oǵan  bıyıl “Mánawiyat orayı” ataması berildi hám  rayonlıq Mádeniyat bóliminiń  balansına ótkerildi.


Mámleketimiz demokratiyalıq  principlerge tiykarlanǵan jámiyet qurıw jolınan barar eken, bunda nızam ústinligi, insan qádiri hám onıń máplerin qorǵaw joqarı qádiriyat dárejesine kóterilgen. Mámleketimizde xalıqtıń múrájatları menen islesiw bárqulla itibarda bolıwı tiyis bolǵan ayırıqsha máselelerden biri bolıp qalmaqta. Sonnan kelip shıqqan halda, rayon hákimligi aymaq turǵınlarınıń hám isbilermenlerdiń Ózbekstan Respublikası Prezidentiniń rayondaǵı Xalıq qabıllawxanasına hám Ózbekstan Respublikası Bas Ministriniń rayondaǵı Isbilermenler múrájatların kórip shıǵıw qabıllawxanasına, sonday-aq, tikkeley jergilikli háqimlikke hár qıylı mashqalalar boyınsha etken múrájatları menen nátiyjeli islenip, olardıń múrájatları belgilengen múddetlerde óz sheshimin tappaqta.
Mısal retinde jıl basınan usı kúnge shekem mine, usı Xalıq qabbılawxanaları arqalı  puqaralardan 259 múrájat kelip túsken bolsa, sonnan 231 múrájattıń rayon kóleminde óz sheshimin tapqanın atap ótiw orınlı.  


 Rayonımız ushın hátteki, respublikamız ushın bıyıl úlken jańalıq boldı.1-6-avgust kúnleri aralıǵında Qubla  Afrika mámleketiniń  Durban qalasında ótkerilgen xalıqaralıq matematika olimpiadasında Ózbekstan Respublikası saylandı komandası quramında qatnasqan rayonımızdaǵı 5-sanlı ulıwma bilim beriw mektebiniń oqıwshısı Damir Dilmuratov indivdual másele sheshiw boyınsha «Húrmet» jarlıǵı hám komandalıq jarısta bronza medalın qolǵa kirgiziwge miyassar boldı hám Qaraqalpaqstan Respublikası Joqarǵı Keńesiniń
«Úmit ushqını» kókirek nıshanı menen sıylıqlandı. Bul óz gezeginde rayonımızdıń jasların ózgeshe kóterińki keypiyat baǵıshladı.


    Aldaǵı waqıtta rayonımız turǵınlarınıń jasaw shárayatların jaqsılaw, rayon kórkin bunnan bılay da zamanagóy kóriniske keltiriw boyınsha úlken wazıypa hám rejelerimizdi aldımızǵa maqset etip qoyǵanbız.


                                                                                                                                                                                                                                                                                                                 Qaraqalpaqstan Respublikası Ministrler Keńesiniń Málimleme xızmeti