21.10.2019, Dúyshembi

Bozataw rayonın rawajlandırıw máselesi dodalandı

Qaraqalpaqstan Respublikası Joqarǵı Keńesinde jańadan shólkemlestirilgen Bozataw rayonın sociallıq-ekonomikalıq jaqtan rawajlandırıw máseleleri, bul boyınsha alda turǵan wazıypalarǵa baǵıshlanǵan májilis bolıp ótti. Májilisti Qaraqalpaqstan Respublikası Joqarǵı Keńesiniń Baslıǵı M.Erniyazov basqarıp bardı.


Atap ótilgenindey, Ózbekstan Respublikası Prezidenti Shavkat Mirziyoev orınlarda ámelge asırılıp atırǵan dóretiwshilik jumıslar, úlken joybarlardıń orınlanıwı menen tanısıw, xalıq penen pikirlesiw maqsetinde usı jıldıń 20-21-avgust kúnleri respublikamızǵa saparı waqtındaǵı baslaması menen sharwashılıqqa qánigelestirilgen Bozataw rayonı shólkemlestirilgen edi. Rayondı 2019-2021-jıllarda sociallıq-ekonomikalıq jaqtan rawajlandırıw baǵdarlamasın ámelge asırıw ushın barlıq dárekler esabınan 309 milliard 142 million sum qarjı talap etiliwi kútilmekte.

Atap aytqanda, sanaat, awıl xojalıǵı hám xızmet kórsetiw tarawlarında ulıwma bahası 45 milliard 132 million sumlıq 57 joybardı ámelge asırıw arqalı 289 jańa jumıs ornın jaratıw  názerde tutılmaqta. Bunnan tısqarı, 2019-2021-jıllarda 118 milliard 89  million sumlıq  qurılıs, rekonstrukciyalaw hám abadanlastırıw jumısların alıp barıw arqalı rayonnıń injenerlik-kommunikaciya tarmaqların rawajlandırıw, 17 irrigaciya hám melioraciya  obektinde rekonstrukciyalaw hám iri ońlaw jumısların alıp barıw, 28 sociallıq infrastruktura obektlerinde qurılıs, rekonstrukciyalaw hám iri ońlaw jumısların ámelge asırıw nazerde tutılmaqta.

Májiliste bir qatar ministrlikler menen uyımlardıń juwapker basshıları shıǵıp sóylep, baǵdarlamada belgilengen wazıypalardı orınlaw boyınsha alda turǵan wazıypalarǵa toqtap ótti.

Qaraqalpaqstan xabar agentligi.