21.10.2019, Dúyshembi

Málimleme xızmetiniń baslıqları tanıstırıldı

Búgin Qaraqalpaqstan Respublikası Ministrler Keńesiniń májilisler zalında Ózbekstan Respublikası Prezidentiniń 2019-jıl 27-iyundegi ““Ǵalaba xabar qurallarınıń biyǵárezligin támiyinlew hám mámleketlik uyımlar hám shólkemlerdiń málimleme xızmetleriniń jumısın rawajlandırıw boyınsha qosımsha ilajlar haqqında”ǵı PQ-4366-sanlı qararınıń orınlanıwı hám onıń mazmun mánisine baǵıshlanǵan “Jámiyet hám mámleketlik basqarıw organlarınıń málimleme xızmeti” temasında baspasóz konferenciyası shólkemlestirildi.


Onda Respublikalıq Ǵalaba xabar qurallarınıń wákilleri menen mámleketlik basqarıw organlarınıń baspasóz xatkerleri qatnastı.


Baspasóz konferenciyasın Minisrler Keńesi baslıǵınıń baspasóz xatkeri Ch.Elmurattov alıp bardı hám Prezident qararı tiykarında Qaraqalpaqstan Respublikası basqarıw uyımlarında alıp barılıp atırǵan jumıslar haqqında toqtap ótti.


Atap ótilgenindey, Qaraqalpaqstan Respublikası Joqarǵı Keńesiniń usı jıldıń 5-avgust sánesindegi 556-sanlı Prezidium qararı, sonday-aq, usı qararǵa tiykar islep shıǵılǵan  Ministrler Keńesiniń 13-avgusttaǵı 271 hám 272-sanlı qararları tiykarında Ministrler Keńesi apparatı menen birge Nókis qalası hám rayon hákimlikeriniń strukturalarına ógeris kirgizilip, óz aldına Málimleme xızmetleri shólkemlestirildi. 


Nókis qalası hám rayon hákimliklerinen mine, usı xızmet baslıǵı ushın usınıs etilgen talabanlar Ministrler Keńesinde dúzilgen arnawlı Jumısshı topar tárepinen sáwbetten ótkerildi hám ılayıq, dep tabılǵanları jańa lawazımlarǵa tayınlandı.

Sonday-aq, usı jıldıń 20-21-avgust kúnleri Húrmetli Prezidentimizdiń Qaraqalpaqstan Respublikasına etken saparı dawamında belgilengen wazıypalar tiykarında  qayta shólkemlestirilgen Bozataw rayonında  da qarar talapları orınlanbaqta. Atap aytqanda, Ministrler Keńesiniń usı jıl 9-sentyabrdegi 304-sanlı qararı tiykarında rayon hákimliginiń strukturasına “Málimleme xızmetiniń baslıǵı” shtat birligi engizildi.


Bunnan soń Qaraqalpaqstan Respublikası Málimleme hám ǵalaba kommunikaciyalar basqarmasınıń Málimleme xızmetleri jumısın shólkemlestiriw hám muwapıqlastırıw sektorınıń baslıǵı B.Erejepov  tárepinen Ózbekstan Respublikası Prezidentiniń 2019-jıl 27-iyundegi PQ-4366-sanlı qararınıń mazmun mánisi keńnen túsindirilip, jurnalist-blogerlerge Nókis qalası hám rayon hákimliklerinde shólkemlestirilgen Málimleme xızmetleriniń baslıqları tanıstırıldı.


Baspasóz-konferenciyası dawamında usı kúnge shekem  Respublikalıq Ǵalaba xabar quralları menen mámleketlik basqarıw organları málimleme xızmetleriniń birge islesiwindegi mashqalalar da keń dodalandı.

Bul baǵdarda  Ózbekstan jurnalistleri dóretiwshilik awqamı Qaraqalpaqstan bóliminiń baslıǵı, “Erkin Qaraqalpaqstan” hám “Vesti Karakalpakstana” gazetalarınıń bas redaktorı K.Reymov hám Qaraqalpaqstan Teleradiokompaniyasınıń direktorı B.Elmanovlar shıǵıp sóylep, basqarıw organı menen jámiyetshilik ortasındaǵı kópir bolǵan Málimleme xızmetleriniń aldaǵı wazıypaları haqqında sóz etip, jańadan tayınlanıp atırǵan Baspasóz xatkerlerin tıǵız birge islesiwge shaqırdı.

Ilaj sońında ǴXQ wákilleri Málimleme xızmetiniń baslıqlarınan ózlerin qızıqtırǵan sorawlarǵa juwaplar aldı.



Qaraqalpaqstan Respublikası Ministrler Keńesiniń Baspasóz xızmeti