22.09.2019, Ekshembi

Bozataw – aydın keleshekke shaqıradı

           «ADAMLAR ERTEŃ EMES, BÚGIN JAQSÍ JASAWÍ KEREK»



Jasıl shatırdaysań jazda sayalı,

«Dem alsam…» der jolawshınıń qıyalı,

Gúz paslında turdıń zer lipas kiyip,

Altın menen shayqaǵanday dúnyanı.


Báhárde ótkende ústińnen seniń,

Quslar juǵırlasqan sestińnen seniń,

Dúnya sonsha sulıw kórindi maǵan,

Názer salsam jasıl kóshkińnen seniń.


Janǵa tiydi qapırıq hawalı qala,

Mashinanı toqtat, Embergen balaA

Qayda júrsem qıyalımda ırǵalar,

Bozatawdıń boyındaǵı toǵaylar.


Bunnan otız jıl burın xalqımızdıń súyikli shayırı, Ózbekstan Qaharmanı I.Yusupovtıń «Bozataw jolındaǵı toǵaylar» atlı qosıǵında táriplegenindey, Kegeyli rayonı aymaǵınan Bozataw elatına ótkennen sońǵı toǵayzarlıqlar hám ondaǵı janǵa jaǵımlı hawa menen gózzal tábiyat kórinisleri tek ǵana usı rayon xalqınıń emes, al, pútkil qaraqalpaqstanlılardıń maqtanıshı edi. 

l979-jılı xalqımızdıń aqsaqalı Qállibek Kamalovtıń baslaması menen kútá uzaqtı gózlep shólkemlestirilgen Bozataw rayonı birinshi márte l988-jılı, sońınan 2004-jılı ayırım túsiniksiz sebeplerge baylanıslı jabılıp, jer maydanı hám xalqı Kegeyli hám Shımbay rayonlarına qosıp berilgen edi. Nátiyjede rayonda jumıs orınları qısqarıp,  qarapayım xalıqtıń kúndelikli turmısında kóplegen qıyınshılıqlar júz berdi. Ayırım shańaraqlar qońsılas Qazaqstan Respublikası, paytaxtımız Nókis qalası, Kegeyli hám Shımbay rayonlarına qonıs ózgertiwge májbúr boldı. Aytar awızǵa ańsat bolǵanı menen Bozataw elatında jasawshı xalıq ushın kútá awır dárt edi. 


Sebebi, hárkimniń tuwǵan jeri Mısır sháhári degenindey, heshkim de úyrenisken jeri, ashshı-dushshını birge tatısqan qońsı-qoba hám dos-yaranlarınan ayırılǵısı kelmeydi. Ásirese, Bozatawdıń boz topıraǵı, sap, taza hawası, aqkókirek hám keńpeyil xalqı kimdi bolsa da erksiz ózine tartadı.  

Ózbekstan Respublikası Prezidenti Shavkat Mirziyoevtiń usı jıldıń 20-2l-avgust sánesinde Qaraqalpaqstanǵa kelgen saparında keń jámiyetshilik wákilleri menen ushırasıwları úlken tariyxıy waqıyalardı ózinde jámlewi menen birge xalqımızdıń kewil keypiyatın kóterip, júreklerge ilham-yosh, kúsh-jiger inam etti. Ásirese, elimizde sharwashılıqtı ele de rawajlandırıw maqsetinde Bozataw rayonın qayta shólkemlestiriw boyınsha bildirgen usınısı pútkil xalqımız tárepinen qızǵın-qollap-quwatlanıp, sheksiz quwanısh penen kútip alındı. 

Bul boyınsha jaqında Qaraqalpaqstan Respublikası Joqarǵı Keńesiniń 27-sessiyasında «Bozataw rayonın qayta shólkemlestiriw tuwralı» arnawlı qarar qabıl etilip, áyne kúnleri jergilikli xalıqtıń sociallıq jasaw sharayatların jaqsılaw, aymaqtıń infrastrukturasın qayta tiklew, sharwashılıqtı rawajlandırıw, isbilermenlikti keńnen en jaydırıw boyınsha jumıslar baslap jiberildi. 

Atap aytqanda, rayon orayında bos turǵan bir qatar hákimshilik imaratları rayon hákimligi balansına alınıp, bul orınlarda kapital ońlaw jumısları qızǵın alıp barılmaqta. Ásirese, Húrmetli Prezidentimizdiń tikkeley kórsetpesi menen «Bozataw» posyolkasında is baslawı kózde tutılǵan aymaqtaǵı mıń adamdı turaqlı jumıs penen támiyinleytuǵın zamanagóy toqımashılıq kárxanası qurılısınıń qızǵın júrgiziliwi jergilikli xalıqtıń erteńgi kúnge degen isenimin bekkemlemekte. 


¬ Bir gezekte 300 hayal-qızlar jumıs isleytuǵın toqımashılıq kárxanasınıń imaratı eki bloktan ibarat bolıp, birinshi blokta tigiwshilik cexı, ekinshisinde jumısshılardıń dem alıw xanaları, atap aytqanda, asxana, kitapxana, monshaxana, dúkan, medicina xanası hám qoymaxana jaylasadı. Kárxananıń qurılısın l-oktyabr sánesine tapsırıwdı rejelestirip qoyıppız, - deydi usı qurılısta islep atırǵan «Nókis agrosanaat qurılıs servis» juwapkershiligi sheklengen jámiyetiniń prorabı Paraxat Áliev. 

Áyne kúnleri burınǵı «Qazanketken» hám «Erkindárya» awıl xojalıǵı kolledjleri imaratlarında jumıssız hayal-qızlardı tigiwshilikke úyretiw boyınsha arnawlı oqıw kursları ashılıp, onda awıl jasları óner úyrenbekte. 

¬ Rayon boyınsha búgingi kúnge deyin úylerinde jumıssız otırǵan 750 hayal-qızdı dizimge alıp, olardı tigiwshilikke úyretiw boyınsha jumıslar baslap jiberildi. Húrmetli Prezidentimiz Sh.Mirziyoevtiń xalqımızǵa kórsetip atırǵan ǵamqorlıǵı ushın oǵan rayon hayal-qızları atınan sheksiz minnetdarshılıq bildiremen, - deydi Xalıq deputatları Bozataw rayonlıq Keńesiniń deputatı Indira Palbekova. 

Álbette, rayonda júz berip atırǵan bunday keń kólemli ózgeris hám jańalanıwlar pútkil aymaq xalqı, sonıń ishinde burın kóp jıllar boyı xalqımızǵa hadal xızmet etip, kópshilikke úlgili isleri menen órnek bolǵan nuranıylardı da sheksiz quwanıshqa bólep, olardı jáne de on-jigirma jasqa jasartıp jiberdi. 


¬ Men usı rayonda l940-jılı tuwılıp, l969-jılı Samarqand awıl xojalıǵı institutın tamamlaǵannan soń M.Jumanazarov atındaǵı xojalıqta bas zootexnik, Kegeyli rayonlıq awıl xojalıq basqarması baslıǵı, «Qazaqdárya», «Qazanketken», «Erkindárya» xojalıqlarında direktor, Bozataw rayonlıq atqarıw komitetiniń baslıǵı bolıp jumıs isledim, -deydi bizge usı aymaq turǵını, Qaraqalpaqstan Respublikasına miyneti sińgen awıl xojalıǵı xızmetkeri, 3-dárejeli «Mehnat fahriysi» kókirek nıshanı iyesi Tańatar aǵa Abdullaev. ¬ Bozataw rayonın qayta shólkemlestiriw boyınsha xabardı esitkenimde júregim xanama sıymay, sheksiz shadlıqqa bólendim. Sebebi, rayon ashılsa kóplegen adamlar jumıs penen támiyinlenip, olardıń kún kórisi, aymaqtıń sociallıq infrastrukturası jaqsılanadı. Bozatawdıń jeri de, eli de jaqsı. Qanday daqıl ekseń de onnan mol zúráát alıwǵa boladı. Ásirese, sharwashılıqqa kútá qolay aymaq. Aldaǵı waqıtları respublika húkimeti rayonǵa basshı kadrlardı durıs tańlap qoya alsa, Bozataw keleshekte respublikamızdıń eń aldınǵı rayonlarınıń birine aylanatuǵınına sóz joq…

l984-jılı instituttıń arnawlı jollaması menen Bozatawǵa jumısqa kelip, 2004-jılǵa deyin rayonlıq mádeniyat bólimin, 20l2-jılǵa deyin «Qazanketken» mádeniyat orayın basqarıp keldim, -deydi bizge jáne bir sáwbetlesimiz, Qaraqalpaqstan Respublikasına miyneti sińgen mádeniyat xızmetkeri Shırazatdin Usnatdinov. ¬  Sońınan 20l8-jılǵa deyin «Qazanketken» posyolkalıq puqaralar jıyında aqsaqal bolıp jumıs isledim. Bozataw rayon bolǵan jılları xalıqtıń kúndelikli turmısı ádewir jaqsı edi. Ásirese, sharwashılıq penen bir qatarda rayonda mádeniyat hám kórkem ónerdi rawajlandırıwǵa, onda islewshi xızmetkerlerdi materiallıq hám morallik jaqtan xoshametlewge rayon hákimligi tárepinen ayrıqsha itibar qaratılatuǵın edi. Usınday qollap-quwatlawdıń arqasında rayonımızdıń mádeniyat bólimi xızmetkerleri hárqıylı respublikalıq tańlawlarda jeńimpaz atanıp, tańlawdıń Ózbekstan basqıshına da qatnasatuǵın edi. Rayon jabılǵannan soń bólimimiz orayǵa aylandırıldı hám kóplegen talantlı jaslarımız jumıssız qalıp, basqa talaplar menen shuǵıllanıwǵa májbúr boldı. 


Húrmetli Prezidentimizdiń usınısı hám respublika húkimetiniń qollap-quwatlawı menen  Bozataw rayonı qayta shólkemlestirilip atırǵan eken, pútkil bozatawshılar sıyaqlı men de bul waqıyadan kútá quwanıshlıman. Bul ǵamqorlıq bizlerge jáne de zor kúsh-quwat baǵıshlap, kewlimdegi ilham-yoshımdı tastırıp jiberdi. 

Túskinlikke tústik biz,

Bunnan on bes jıl burın. 

Qálbime kirgen qara muz,

Jılıw tapqanday búgin.


Qıyınshılıq, ǵam-qayǵı,

Artta qalǵanı bolsın. 

Xalqı súygen Jurtbasshım,

Baxtımızǵa saw bolsınA

Shınında da, aymaq xalqı menen gúrrińleser ekenbiz, olardıń kewillerindegi ózgeshe shadlıq, kózlerindegi erteńgi kúnge degen isenim kimdi bolsa da erksiz quwanıshqa bólep, bozatawshılardı aydın keleshekke qaray shaqıradı. 

Ádilbay ORAZOV,

arnawlı xabarshımız.

Bozataw rayonı

SÚWRETLERDE:

1. Xalıq deputatları Bozataw rayonlıq Keńesiniń deputatı I.Palbekova qurılıs prorabı P.Áliev penen tigiwshilik kárxanasınıń qurılısında.

2. Tigiwshilikti úyrenip atırǵan hayal-qızlar.

3. Qaraqalpaqstan Respublikasına miyneti sińgen awıl xojalıǵı xızmetkeri T.Abdullaev.

4. Qaraqalpaqstan Respublikasına miyneti sińgen mádeniyat xızmetkeri Sh.Usnatdinov.

5. Rayon orayında jollardı asfaltlap atırǵan jolshılar.

  

“Erkin Qaraqalpaqstan” gazetasınıń 2019 jıl 10-sentyabrdegi 108-sanınan alındı.