22.09.2019, Ekshembi

Brakonerlerge jınayat isi qozǵaldı

Sociallıq tarmaqlarda Moynaq rayonı aymaǵında bir neshe brakonerlerdiń nızamsız túrde ań awlap, olardı toqtatpaqshı bolǵan Qaraqalpaqstan Respublikası Ekologiya hám qorshaǵan ortalıqtı qorǵaw komitetiniń inspektorlarınıń avtomashinasına ózleriniń ań mıltıǵı menen oq atqanı haqqındaǵı material hám video kórinisler kópshiliktiń dıqqatın ózine tartpaqta.


Járiyalanǵan materialda Qaraqalpaqstan Respublikası Ishki isler ministrliginniń málimleme xızmeti bul haqqında rásmiy maǵlıwmat bermegeni de qosımsha etilgen. 

Itibarıńızǵa ministrlik málimleme xızmetiniń usı rásmiy maǵlıwmatı hesh qanday ózgerislersiz usınılmaqta.

2019-jıldıń 5-sentyabr sánesi azanǵı saat 06:30 lar shamasında Qaraozek rayonında jasawshı puqaralar: 1972-jılı tuwılǵan  R.G, 1975- jılı tuwılǵan I.M, 1980 jılı tuwılǵan S.D, 1978-jılı tuwılǵan K,T hám 1990 jılı tuwılǵan U.A. lar ózleriniń  basqarıwındaǵı “UAZ-469” markalı m/b. 80S 401 EA avtomashinada Moynak rayonı Qazaqdarya APJ aymaǵında jaylasqan Akpetkey kólinde nızamsız túrde ań awlawǵa barǵan waktında olardı Qaraqalpaqstan Respublikası Ekologiya hám qorshaǵan ortalıqtı qorǵaw komitetiniń “UAZ-469” markalı m.b. 654 GA xızmet avtomashinasın basqarıp kiyatırǵan xızmetkerleri toqtatpaqshı bolǵanında, brakonerler nızamǵa boysınbay qarsılık kórsetip, avtomashina ishinde bolǵan D.S ózi menen birge alıp jurgen 12-kalibrli 2 stvollı ań quralı menen komitet xızmetkerleri basqarıwındaǵı xızmet avtomashinasınıń balon tárepine qarata oq atıp avtomashinaǵa materiallıq zıyan keltirip waqıya ornınan ketip qalǵan. 

Bul halat  boyınsha Ózbekistan Respublikası Jınayat kodeksiniń 219-statiyası 2-bólimi menen Qaraqalpaqstan Respublikası Moynaq rayonı prokraturası tarepinen jınayat isi qozǵatılıp házirgi waqıtta tergew jumısları alıp barılmaqta.


Qaraqalpaqstan Respublikası Ministrler Keńesiniń Málimleme xızmeti