19.09.2020, Shembi

Prezident dúnyaqarasın ózgertpegen sektor basshıların sınǵa aldı


Ózbekstan Respublikası Prezidenti SHavkat Mirziyoevtiń basshılıǵında Nókis qalasında Qaraqalpaqstandı hár tárepleme rawajlandırıw boyınsha májilis bolıp ótpekte.

Onda Qaraqalpaqstan Respublikası Joqarǵı Keńesi hám Ministrler Keńesi, qala hám rayonlardıń sektor basshıları, ministrlikler menen vedomstvolardıń juwaplı basshıları qatnaspaqta.

Barlıq tarawlar menen aymaqlarda, sonıń ishinde, Qaraqalpaqstanda da unamlı sapa ózgerisleri támiyinlenbekte. Birinshi yarım jıllıqta jalpı aymaqlıq ónim 7,2 proucentke, awıl xojalıǵı ónimlerin islep shıǵarıw 5,4 procentke, qurılıs jumıslarınıń kólemi 45 procentke ósken.

Prezidentimiz aymaqta ele de mashqalalardıń kóp ekenin, sanaattı rawajlandırıw, jumıs orınların kóbeytiw boyınsha jumıslardıń jetkiliksiz ekenin atap ótti. 


– Bul jerge shapalaq urıw ushın emes, al islew ushın, xalqımızdıń kózin kóriw ushın keldim, – dedi SHavkat Mirziyoev. – Dúnyaqarasın ózgertpegen sektor basshıları ayaǵımızǵa kisen boladı. Jumısqa kirgen bir hayal-qızdıń baxıtın kóz aldıńızǵa keltire alasız ba? Jaslardı kim jeteleydi, durıs baǵdar beredi? Moynaq mısalın kórdińiz. Adamlardıń kózlerinde «islewge boladı eken-ǵo» degen nur bar. Biraq, endi bul tariyx. Barlıq rayonlarda ózgerisler islew kerek. 

Birinshi yarım jıllıqta Qaraqalpaqstanda sanaat islep shıǵarıwdıń kólemi bar-joǵı 0,5 procentke óskeni, Taxtakópir, SHomanay, Nókis, SHımbay, Tórtkúl, Kegeyli rayonlarında sanaattıń derlik joq ekeni sınǵa alındı. Xızmet kórsetiw, isbilermenliktiń rawadlanıwı da tómen dárejede ekeni kórsetip ótildi. 

– Sońǵı úsh jıldıń ishinde túp reformalar nátiyjesinde kóplegen tarawlardı erkinlestirdik, olardıń rawajlanıwına tosqınlıq etken sheklewlerdi biykar ettik. Qaraqalpaqstanda da hár bir sektor basshısı sheklewlerdi biykar etemen, isbilermenge xızmet etemen, degen qaǵıyda, uran menen islewi kerek, – dedi Prezident.