23.08.2019, Juma

Moynaqta eki stadion paydalanıwǵa tapsırıldı

Moynaq rayonınıń “Úshsay” hám «Tik ózek» Awıl puqaralar jıyınlarında kishi sport maydanshaları paydalanıwǵa tapsırıldı. Bul haqqında rayon xabarshısı málim etti.


Usı múnásibet bolıp ótken ilajda rayon hákimi E.Edenbaev, tiyisli mákemlerdiń basshıları hám APJ turǵınları, sonday-aq, jas óspirimler qatnastı.


22x40 metrlik ólshemdegi maydanshalar «Abat máhálle» baǵdarlaması sheńberinde «Yashna Moynaq» JSHJ tárepinen qurıp pitkerildi. Sonday-aq, “Úshsay” APJ aymaǵındaǵı maydanshasınıń qurılısına “Ústirt gaz” JSHJniń qáwenderlik etkenin atap ótiw orınlı.


– Búgin tapsırılıp atırǵan zamanagóy sport maydanshaları aymaǵımız jasları ushın úlken sawǵa boldı, – deydi 80 jaslı nuranıy Qırıqbay Matkeshov. –Jaslıq waqtımda sporttıń voleybol túri menen shuǵıllanıp, Qaraqalpaqstan saylandı komandasınıń aǵzası bolǵanman. Moynaq rayonınan kóp sanlı sportshılar jetilisip shıqqan. Házirgi áwladlarǵa qaratıp atırǵan joqarı ǵamxorlıǵı ushın Jurtbasshımızǵa úlken minnetdarshılıq bildiremiz. Bunnan bılay da rayonımızdan belgili sportshılardıń jetilisip shıǵıwına isenemen.


Qaraqalpaqstan Respublikası Ministrler Keńesiniń Málimleme xızmeti