21.07.2019, Ekshembi

Xojelide 11 hayal-qızlarǵa jańa turaq jaylardıń giltleri tapsırıldı

Xojeli rayonında  turaq-jay sharayatın jaqsılawga mútáj,  bir úyde kópshilik bolıp jasaytuǵın shańaraqlar,  perzentlerin kem támiyinlengen shańaraqlarda tárbiyalap atırǵan,  sonıń menen birge,   shańaraǵında mayıplıǵı bolǵan,  mayıplıqqa alıp keliwshi kesellikke shalınǵan,  sonday-aq,  baǵıwshısın joǵaltqan 11 hayal-qızlarǵa «Jan-qońırat» MPJ aymaǵında qurıp pitkerilgen úlgi joybarlar tiykarında qurılǵan arzan úy-jaylardıń giltleri tapsırıldı. Bul haqqında rayon hákimliniń málimleme xızmeti xabar berdi.



Usı múnásibet penen bolıp ótken ilajda  Qaraqalpaqstan Respublikası Ministrler Keńesi Baslıǵınıń orınbasarı – Respublikalıq hayal-qızlar komitetiniń baslıǵı Z.Ibragimova,  rayon hákimi J.Ermashev hám basqalar qatnastı hám jańa turaq jay iyelerin qızǵın qutlıqladı.


Áhmiyetli tárepi sonda,  turaq jaylardıń baslanǵısh tólemleriniń 10 payızı Qaraqalpaqstan Respublikası Máhálle fondı tárepinen tólep berildi.

Sonday-aq,  usı jańa turaq jayǵa iye bolıp atırǵan bir neshe hayal-qızlar Hayal-kızlar komiteti tárepinen tigiw mashinaları menen támiyinlenip,  «Ózbekstan temir jolları» jáne «Xojeli paxta talshıǵı»JSHJleri tárepinen olardıń úy sharayatında jumıstı bólip islewshi sıpatında turaqlı bántligi támiyinlendi.

Maǵlıwmat ornında atap ótetuǵın bolsaq,  bul ilajlar Ózbekstan Respublikası Prezidentiniń 2016-jıl 21-oktyabrdegi «2017-2021 jıllarda awıllıq jerlerde jańa úlgi joybarlar tiykarında arzan turaq-jaylar salıw baǵdarlaması haqkında»ǵı PQ-2639-sanlı qararı talapları tiykarında ámelge asırılmaqta.

Qaraqalpaqstan Respublikası Ministrler Keńesiniń Málimleme xızmeti