21.07.2019, Ekshembi

«Moynaq gerbish zavodı"nda kúnine 63 mıń danaǵa jaqın gerbish shıǵarılmaqta

 Usı jıldıń fevral ayında óz jumısın baslaǵan «Moynaq gerbish zavodı" juwapkershiligi sheklengen jámiyetinde kúnine 63 mıń danaǵa jaqın gerbish shıǵarılmaqta. Bul haqqında rayon xabarshısı Z.Qaljanova obektten málim etti.



Qıtaydan alıp kelingen ásbap-úskeneler ornatılǵan JSHJde kúnine 58 mıńnan 63 mıńǵa shekemgi aralıqta gerbish shıǵarıladı. Qam gerbishler sońınan arnawlı qumbızǵa salınıp pisken gerbish halatına keledi hám buyırıtpashılarǵa jetkerilip beriledi. Qumbızdın sıyımlılıǵı 250 mıń gerbish bolıp, sonnan kúnine 35-40 mıń pisken gerbish tayarlanadı. 

«Moynaq gerbish zavodı" juwapkershiligi sheklengen jámiyetinde sonıń menen birge jáne bir qosımsha stanok ornatılmaqta. Bundaǵı tiykarǵı maqset – qısqa tayarlıq, yaǵnıy jumısshılardı qıs aylarında da jumıs penen támiyinlew bolıp tabıladı. 


Texnikalardan bolsa 3 pogruzщik, 4 júk tasıwshı kamaz, 2 hawa júk mashinası xızmet etpekte. Áhmiyetlisi, kárxanada 45 adamnıń bántligi támiyinlengen. Olardıń kópshiligi rayon jaslarınan ibarat.

– Maqsetimiz qoldan kelgenshe rayondı rawajlandırıwǵa úlesimizdi qosıp,  orayda salınıp atırǵan kóp qabatlı turaq jaylarǵa ózimizde islep shıǵarılıp atırǵan pisken gerbishlerdi óz waqtında úzliksiz jetkerip beriwden ibarat deydi,– «Moynaq gerbish zavodı" juwapkershiligi sheklengen jámiyetiniń is júritiwshisi E.Pirniyazov.

Qaraqalpaqstan Respublikası Ministrler Keńesiniń Málimleme xızmeti