19.06.2019, Sárshembi

Barlıq rayon hákimleri ushın seminar shólkemlestirildi

Nókis rayonı «Qırantaw» awıl puqaralar jıyını aymaǵındaǵı Dán hám sobıqlı eginler ilimiy izertlew institutı Qaraqalpaqstan ilimiy tájiriybe stanciyasında «Qaraqalpaqstanda egiletuǵın hám mámleketlik sort sınawınan ótip atırǵan jergilikli,  Krasnodar selekciyasına tiyisli gúzgi biyday sortları» atamasında seminar shólkemlestirildi. Bul haqqında hákimliktiń rásmiy veb-saytı xabar berdi.



Seminarǵa Qaraqalpaqstan Respublikası Ministrler Keńesi Bakslıǵınıń Awıl hám suw xojalıǵı máseleleri boyınsha orınbasarı S.Xojametov hám respublikamızdıń hám barlıq rayon hákimleri qatnastı.

Seminarda atap ótilgenindey,  xalqımızdıń dán ónimlerine bolǵan talabın ózimizde jetilistirilgen ónim esabınan kanaatlandırıw baǵdarında áhmiyetli jumıslar ámelge asırılmaqta. Biyday tárbiyası agrotexnikalıq ilajlarǵa say shólkemlestirilgen jaǵdayda ǵana joqarı zuráát alınatuǵının diyqanlarımız júdá jaqsı biledi. Sońǵı jılları respublikamızda ǵálle jetistiriwdi kóbeytiw hám ıqlımǵa kolaylı joqarı zúráátli sortlardı tańlap egiw boyınsha keń kólemdegi ámeliy jumıslar alıp barılıp atır. Bul zúráátliktiń artıwına da tásir etpekte.


Ózbekstan Respublikasında búgingi kúnde egis múddeti,  egis norması,  mineral tóginler,  kesellik hám zıyankeslerge,  qurǵaqshılıqka,  dán tóginlerine,  shorǵa,  jıǵılıp qalıwǵa,  gúzgi jumsaq biydaydıń 50 hám qattı biydaydıń 7 sortı mámleketlik reestrge kirgizilip egiwge usınıs etilgen.

Usılardan tómendegi biyday sortları Karaqalpaqstanda keń tarqalǵan. «Mars-1» sortı,  «Asr» sortı,  «Zvezda» sortı,  «Davr» sortı,  «Krasnodarskaya-99» sortı,  «Vostorg» sortı,  «Pervica» sortı hám «Alekseich» sortların qaraqalpaqstanda ushratıwmızǵa boladı.


Ilaj sońında seminar qatnasıwshıları tárepinen kelesi jılda aymaǵımızda egiletuǵın ǵálle sortı anıqlap alındı.

Qaraqalpaqstan Respublikası Ministrler Keńesiniń Málimleme xızmeti