19.05.2019, Ekshembi

Kóshede kitap oqıp kiyatırǵan Gúlzada Hákimniń alǵısına mıyasar boldı

Óz xızmet mashinasında jumıs babı kóshede ketip baratırǵan Xojeli rayonınıń hákimi Jeńis Ermashev jol boyında kitap oqıp baratırǵan kitapqumar oqıwshı qızǵa qayıl qalıp, oǵan kitap hám ruchka sawǵa etti. Bul haqqında rayon hákimining instagram tarmaǵında xabar berildi.


–Keshki saat 19:30 lar shamasında xızmet babı menen Xojeli rayonı "Kulab" APJ aymaǵınan kiyatırıp jol boyında bir mektep oqıwshısınıń kitap oqıp baratırǵanı meniń dıqqatımdı ózine tarttı, – deydi J.Ermashev. – Mashinamızdı dárhál toqtatıp, ol qızdan ózin tanıstırıwın soradım. Rayonlıq 7-mekteptiń 9-b klass oqıwshısı Tursınbaeva Gúlzadanıń usı kúnlerde elimiz boylap 90 jıllıq yubiley toyı belgilenip atırǵan Ullı shayırımız I.Yusupovtıń shıǵarmaların piyada júrip oqıp baratırǵanı meni sheksiz quwanıshqa bóledi. Sol jerdiń ózinde ol maǵan shayırdın "Ayt sen Ájiniyazdıń qosıqlarınan" dóretpesin yadka aytıp berip, ózinin qanshelli kitapkumar hám talantlı ekenligin dáliylledi.


 Onı usınday etip tárbiyalap atırǵan ata-anasına, sonday-aq, mekteptegi ustazı Qannazarova Gúlnaraǵa tereń alǵısımızdı aytamız!!!