16.11.2018, Жума

Қытайдың Өзбекстандағы елшиси Беруний районында пахта терди


     Алдын хабар етилгениндей, Қытай Халық Республикасының Өзбекстандағы Айрықша ҳəм толық ҳуқықлы елшиси Цзянь Янь ханымның республикамызға сапары даўам етпекте. Елши 4-октябрь күни Беруний районында болды.

    Мийман дəслеп райондағы Қытай Халық Республикасының «Шаньси Эко Цемент» компаниясының тиккелей инвестициясы менен қурылысы басланыў алдында турған «Шаббаз обод цемент» ЖШЖне тийисли цемент заводы қурылатуғын жер майданын көзден өткерди. Бул жерде алып барылып атырған жумыслар менен жақыннан танысып, шериклик негизинде қурып-питкерилиўи режелестирилген цемент заводы жойбарын жоқары баҳалады.


    Буннан соң мийманлар «Абай» АПЖ аймағындағы «Шахрихан Надирбек» фермер хожалығында болып, усы жылдың апрель айында қытайлы қəнигелердиң қатнасыўында шорланған жерлерде тəжирийбе сыпатында егилген пахта атызын көзден өткерди. Шигиттиң өнип шығыўы ҳəм зүрəəти менен қызықсынды. Əҳмийетлиси, Цзянь Янь ханым усы пахта атызында айрықша қызығыўшылық пенен пахта терди. Ол пахта териминде тиккелей өзи қатнасқанлығынан ҳəм бул арқалы өзиниң пахта териў əрманының орынланғанлығынан қуўанышлы екенин айтып, бул ушын фермер хожалығы менен «Абай» АПЖ басшыларына өз миннетдаршылығын билдирди.


   Пахта териминен соң мийманлар райондағы «Қуралпа» қаўын базарын барып көрип, ол жердеги баҳалар менен танысты ҳəм қаўынлардың мазасына жоқары баҳа берди.

   Күнниң екинши ярымында мийманлар «Кашфиётчи ёшлар» жеке меншик кəрханасына тийисли гидропоника усылында помидор жетистириўши теплицада болып, ол жердеги жумыслар менен де жақыннан танысты ҳəм кəрхана басшысына өзиниң унамлы пикирлерин билдирди. 

   Елшиниң пахта теримине қатнасыўы барлық жасларымызды, гүллəн халқымызды пахтаның бир ханасын да зая етпей жыйнап-терип алыўға руўхландырады, деген үмиттемиз.