19.09.2020, Шемби

Әҳмийетли илажға бағышланды

Қарақалпақстан Республикасы Турақ жай коммуналлық хызмет көрсетиў министрлиги тәрепинен «Халықты сапалы ишимлик суўы менен тәмийинлеўди жақсылаў бойынша әмелге асырылып атырған жумыслар ҳәм келеси жыллар режелери ҳаққында» баспасөз конференциясы болып өтти. Оған тараў қәнигелери ҳәм ғалаба хабар қуралларының хызметкерлери қатнасты. 


Илажды Қарақалпақстан Республикасы Министрлер Кеңеси Баслығының баспасөз хаткери Ч.Елмуратов басқарып барды. Онда «Түйемойын-Нөкис» регионаллық суў тармағынан пайдаланыў басқармасы МУК директоры ўазыйпасын атқарыўшы М.Утениязов, Қарақалпақстан Республикасы Турақ жай коммуналлық хызмет көрсетиў министрлигиниң басқарма баслығы Н.Султановлар шығып сөйлеп, республикамызда халыққа таза ишимлик суўын жеткерип бериў ҳәм канализация қубырларын жаңалаў бағдарында жүргизилип атырған жумысларға айрықша тоқтап өтти. 


Илажда атап өтилгениндей, елимизде жүргизилип атырған «Абат аўыл» бағдарламасы шеңберинде халқымызға таза ишимлик суўын жеткерип бериўде нәтийжели жумыслар әмелге асырылмақта. Атап айтқанда, Елликқала районындағы «Шуқырқақ» АПЖ, Төрткүл райоындағы «Жамбасқала» ҳәм «Наўрыз» АПЖ, соның менен бирге, Тахтакөпир районының алыс аймақларында жайласқан суў жеткерип бериўши объектлерге реконструкция жумыслары жүргизилип, сапалы ишимлик суўы менен тәмийинленди. Жеткерилип берилген ишимлик суўдың баҳасы бир сум етип белгиленген. Әлбетте, бул илажлар Ҳүкиметимиз тәрепинен жаратылған жеңилликлердиң бири есапланады. 


­ Кәрханамыз тийкарынан халыққа таза ишимлик суўын жеткерип бериў ҳәм ақаба суўларды алып шығыў менен шуғылланады, ­ дейди «Түйемойын-Нөкис» регионаллық суў тармағынан пайдаланыў басқармасы МУК директоры ўазыйпасын атқарыўшы М.Утениязов. ­ Бүгинги күнде республикамыздың 60 проценти орайластырылған таза ишимлик суўы менен тәмийинленген. Алдағы ўақытлары бул жумысларды еле де жетилистириў ҳәм заманагөй суў жеткерип бериў үскенелерин орнатыў режелестирилмекте.  


Конференция қатнасыўшылары пуқараларымыз арасында ишимлик суўларынан нәтийжели пайдаланыў ҳәм суў есаплағыш үскенелерин орнатыў мәдениятын жетилистириў бойынша да пикир-усынысларын билдирди. Илаж соңында журналистлер өзлерин қызықтырған сораўларға қәнигелерден жуўап алды. 


А.ОРАЗОВ.

СҮЎРЕТТЕ: илаждан көринис.