23.11.2019, Шемби

Мәлимлеме хызметиниң баслықлары таныстырылды

Бүгин Қарақалпақстан Республикасы Министрлер Кеңесиниң мәжилислер залында Өзбекстан Республикасы Президентиниң 2019-жыл 27-июндеги ““Ғалаба хабар қуралларының бийғәрезлигин тәмийинлеў ҳәм мәмлекетлик уйымлар ҳәм шөлкемлердиң мәлимлеме хызметлериниң жумысын раўажландырыў бойынша қосымша илажлар ҳаққында”ғы ПҚ-4366-санлы қарарының орынланыўы ҳәм оның мазмун мәнисине бағышланған “Жәмийет ҳәм мәмлекетлик басқарыў органларының мәлимлеме хызмети” темасында баспасөз конференциясы шөлкемлестирилди.



Онда Республикалық Ғалаба хабар қуралларының ўәкиллери менен мәмлекетлик басқарыў органларының баспасөз хаткерлери қатнасты.



Баспасөз конференциясын Минисрлер Кеңеси баслығының баспасөз хаткери Ч.Елмураттов алып барды ҳәм Президент қарары тийкарында Қарақалпақстан Республикасы басқарыў уйымларында алып барылып атырған жумыслар ҳаққында тоқтап өтти.


Атап өтилгениндей, Қарақалпақстан Республикасы Жоқарғы Кеңесиниң усы жылдың 5-август сәнесиндеги 556-санлы Президиум қарары, сондай-ақ, усы қарарға тийкар ислеп шығылған  Министрлер Кеңесиниң 13-августтағы 271 ҳәм 272-санлы қарарлары тийкарында Министрлер Кеңеси аппараты менен бирге Нөкис қаласы ҳәм район ҳәкимликериниң структураларына өгерис киргизилип, өз алдына Мәлимлеме хызметлери шөлкемлестирилди. 


Нөкис қаласы ҳәм район ҳәкимликлеринен мине, усы хызмет баслығы ушын усыныс етилген талабанлар Министрлер Кеңесинде дүзилген арнаўлы Жумысшы топар тәрепинен сәўбеттен өткерилди ҳәм ылайық, деп табылғанлары жаңа лаўазымларға тайынланды.


Сондай-ақ, усы жылдың 20-21-август күнлери Ҳүрметли Президентимиздиң Қарақалпақстан Республикасына еткен сапары даўамында белгиленген ўазыйпалар тийкарында  қайта шөлкемлестирилген Бозатаў районында  да қарар талаплары орынланбақта. Атап айтқанда, Министрлер Кеңесиниң усы жыл 9-сентябрдеги 304-санлы қарары тийкарында район ҳәкимлигиниң структурасына “Мәлимлеме хызметиниң баслығы” штат бирлиги енгизилди.


Буннан соң Қарақалпақстан Республикасы Мәлимлеме ҳәм ғалаба коммуникациялар басқармасының Мәлимлеме хызметлери жумысын шөлкемлестириў ҳәм муўапықластырыў секторының баслығы Б.Ережепов  тәрепинен Өзбекстан Республикасы Президентиниң 2019-жыл 27-июндеги ПҚ-4366-санлы қарарының мазмун мәниси кеңнен түсиндирилип, журналист-блогерлерге Нөкис қаласы ҳәм район ҳәкимликлеринде шөлкемлестирилген Мәлимлеме хызметлериниң баслықлары таныстырылды.


Баспасөз-конференциясы даўамында усы күнге шекем  Республикалық Ғалаба хабар қураллары менен мәмлекетлик басқарыў органлары мәлимлеме хызметлериниң бирге ислесиўиндеги машқалалар да кең додаланды.


Бул бағдарда  Өзбекстан журналистлери дөретиўшилик аўқамы Қарақалпақстан бөлиминиң баслығы, “Еркин Қарақалпақстан” ҳәм “Вести Каракалпакстана” газеталарының бас редакторы К.Реймов ҳәм Қарақалпақстан Телерадиокомпаниясының директоры Б.Ельмановлар шығып сөйлеп, басқарыў органы менен жәмийетшилик ортасындағы көпир болған Мәлимлеме хызметлериниң алдағы ўазыйпалары ҳаққында сөз етип, жаңадан тайынланып атырған Баспасөз хаткерлерин тығыз бирге ислесиўге шақырды.


Илаж соңында ҒХҚ ўәкиллери Мәлимлеме хызметиниң баслықларынан өзлерин қызықтырған сораўларға жуўаплар алды.



Қарақалпақстан Республикасы Министрлер Кеңесиниң Баспасөз хызмети